رەقا لدژی هسد دەردكەڤە راپەرینێ

خوەنیشاندان و نەرازیبوون لدژی چەكدارێن سووریایا دیموقراتیك ل باژارێ رەقا و گوندەوارێ وێ بەرفرەهتر دبن، ئەڤە دوو رۆژن ژی ئاستا دژاتیێ بلنتر بوویە.

ئاژانسا سپۆتنیك یا رۆسی بەلاڤكریە كو دوو چەكدارێن سووریایا دیموقراتیك ئیرۆ ب دوو بۆمبەیێن دەستی كو ژ ئالیێ كەسنە روونوخماندی ڤە هاتن ئاڤێتن، هاتن كوشتن، هەروەها چار چەكدارێن دن ژی برینداربوون.

ل گۆری سپۆتنیك كو دەوریەكە هەسەدێ ژی ل ناڤا باژارێ رەقایێ راستی ئارمانجكرنێ هات و زیان تەنێ مادی بوون، هەروەها ل گوندێ قبر یێ باشوورێ باژارێ سلووك ژی چەكدارەك هات كوشتن و هەژمارەك چەكدارێن دن ژی برینداربوون.

مەها بۆری ژی ل باژارێ ئەلمەنسوورە یێ گوندەوارێ رەقایێ بارەگەه و ئۆفیسێن هەسەدێ هاتن شەوتاندن و خوەنیشاندان ژی هاتن لدارخستن، و دەوریێن هەسەدێ ژبۆ گرتنا جوانان ژبۆ لەشكەریا خوە یا نەچاری ژئالیێ وەلاتیێن وێ دەڤەرێ ڤە هاتن دەركرن.

ژبۆ رزگاركرنا باژارێ رەقا، منبج، تەپقا و گوندەوارێ دێرازۆرێ، پارتیا یەكیتیا دیموقراتیك پەیەدێ ب هەزاران جوانێن كورد كو ژبۆ لەشكەریا خوە یا نەچاری رەڤاندبوون، كرن قوربانی و شەهیدكرن، و د هەیاما دوو سالێن بۆری دە پەیەدێ دەردۆرا هەزار گرتیێن داعشێ كو بتۆمەتا ئالیكاری و ئەندامتیا داعشێ هاتبوون گرتن، ژ زیندانێن خوە لژێر ناڤێ لێبۆرین و براتیا گەلان دە سەربەست بەردان.

528