بەرسڤەک بۆ دیار دێرسم

بەرسڤەک بۆ دیار دێرسم
شێخۆ عەفرینی

ھەڤالەکی من ل سەر تۆرا جڤاکی یا فێسبۆکێ، پەرچەڤیدیۆیەک ژ من رە شاند، من ڤەکر و لێ گوھدار کر، پەرچەڤیدیۆیا ھۆزان دیار دێرسم بوو، د چەند خولەکان دە ژ بلی ژەھرێ ژ دەڤێ وی دەرنەدکەت، من گۆت کا ئەز تەکەز بکم کو ئەڤ لێدوان نوویە یان کەڤنە، پشتی من لێگەرینەک د کەنال و مالپەرێن پەکەکێ دە کر، من پشتراست کر کو نوویە ل سەر کەنالەکە وان بەلاڤ بوویە.
د لێدوانا خوە دە، دیار نە ل سەر سترانەکێ، ھەلبەستەکێ یان سازەکێ دپەیڤە و رەخنە دکە، لێ بەلێ زماندرێژی و دەستێوەردانەکە تووژ و بێسوود د سیاسەتێ دە دکە و گۆتنا کو ژێ ھاتیە خوەستن دکە.

بێگومان ژ مافێ ھەر کەسەکییە کو رەخنەیان بگرە، لێ دەما ژ سینۆرێ خوە دەرکەڤە، وێ دەمێ دبە زماندرێژی و بێرەوشتی. دیار د لێدوانا خوە دە رەخنەیان ل ھەبوونا خالێن لەشکەری یێن ترکیێ ل ھەرێما کوردستانێ دگرە، و پارتیا دەمۆکراتا کوردستان پەدەکێ ب ئیخانەتێ تاوانبار دکە.

یەکەم تشت، کا ئەم ب ھەڤ رە ل سەدەمێن ھەبوونا ترکیێ ل ھەرێما کوردستانێ بنێرن، ما نە ھەبوون و دەستێوەردانا پەکەکێ د کارووبارێن ناڤخوە یێن ھەرێمێ دە بوونە سەدەما سەرەکە ژ ھەبوونا ترکیێ، ئەگەر پەکەکە نەبا، گەلۆ ترکیێ دکاری بۆستەکێ دەرباس ببە؟

پەکەکێ، کو باکورێ کوردستانێ ئاڤێتیە پاش ملێ خوە، ھاتیە ل ھەرێما ئازاد خوە کریە عەنتەر و زەندبادایی، شەرێ خوە لگەل ترکیێ راگھاندیە، چما ڤەنەگەرە چیایێن باکور، ما نە چیایێن باکور ژ یێن باشوور بلندتر و ئاسێترن. تە ھەتا نھا چما بۆستەک ل باکور رزگار نەکریە، و تو دخوازی ھەرێمەکا ئازاد تێک بدی و قەوارەیا وێ ژ ناڤ ببی! ئەڤە کوردایەتییە؟

ما گەلۆ پەدەکە بوو، یێ کو ئیخانەت ل عەفرین و 7 ناڤچەیێن وێ و 360 گوندان سالا 2018 کریە؟ ما گەلۆ پەدەکێ ئیخانەت ب سەرێ کانیێ کریە و گرێ سپی سالا 2019 کریە؟ ما گەلۆ پەدەکێ ئیخانەت ل 600 گوندێن باشوور کریە، کو شێنیێن وێ نکارن ڤەگەرن سەر زێدێن خوە؟ ما گەلۆ پەدەکێ ئیخانەت ب 25 ھەزار جوانێن کورد ل رۆژئاڤایێ کوردستانێ کریە کو ژ بەر باژارێ عەرەبان وەک رەقا، دێرەزۆرێ، تل رفعەتێ، مونبجێ دانە کوشتن و بریندارکرن؟

ما پەدەکە بوو ب ھەزاران زارۆکێن کوردان بۆ لەشکەریا نەچار رەڤاندینە و داییکێن وان کەزەب شەوتی ھشتنە؟ ما پەدەکێ، رووپەلا کوردان ل سەر ئاستا جیھانێ چ ناڤدەولەتی و ناڤنەتەوی بە، رەش کریە، و ب تەرۆرێ ڤە گرێ دایە؟

ئەڤ تەنێ چەند خالن، مە بەحس کریە، ئەگەر ئەم بدن پەی ھەڤ، پرتووک و رۆمان تێرێ ناکن، دیسا ژی دیار، ئەڤ یەک ئاڤێتیە پاش گوھێ خوە و ھاتیە گۆتنێن عەلاش و بەلاش ل سەر ھلگرێن دۆزا کوردی و پارێزڤانێن کوردستانێ دکە.

ب سەدان دۆسیە، تاوان و بنپێکرن ھەنە کو ھندەک ژ وان تێنە گۆتن و ھندەک ژی نایێن گۆتن د ستوویێ پەکەکێ دە نە، لێ خوە بێگونەھ دەردخە و وەلاتپارێز و نشتیمانپەروەرێن دلسۆز وەکە پەدەکێ خایین دەردخینە. کەسێن وەکە دیار ل سەر ڤان فەلاکەتان بێدەنگن.

ھونەرمەند دڤێت ب ئەرکێ خوە د گھاندنا ئێش و ئازارێن مللەتێ خوە، ب دەنگ و ھەلبەستێن خوە بگھینە جیھانێ، نە فتنێ و بێبەختیێ بکە.

ھەرێما کوردستانێ ب حکوومەتا خوە ڤە، د دستوورێ دە دانپێدانکرییە، ئازادە، سەربەستە، لێ 3 پەرچەیێن دن بدەستن، نایێ ھشێ مرۆڤان کو تو 3 پەرچەیان بھێلی و جھێ خوە ل ھەرێما ئازاد گەرم بکی، ئەگەر تو ئەوقاس مەرد و مێرخاسی، کەرەم بکە ھەرە قادا خوە ل باکور شەر بکە. ھێزێن پێشمەرگەیێن قەھرەمان ھەنە، ھەرێما کوردستانێ دپارێزن و دێ بپارێزن، پێویست ناکە تو بمینی، ئەگەر تو چووی وێ دەمێ، چ بەھانەیا ترکیێ ژی نامینە، دێ نەچار ببە دەرکەڤە.

ئەز ب ھێڤی مە ھۆزان دیار دێرسم کەد و بەرھەما خوە ب ڤان لێدوان و داخویانێن ژەھرکری تێک نەدە، دیسا ژی ئەم دێ تەکەز بکن کو رەخنەگرتن ژ مافێ ھەموویانە، لێ نەبە زێدەگاڤی و نەشێرینی، تو دکاری پارتیا کو، دلێ تە ژێ رە رحەت دبە، ھلبژێری، لێ تو نکاری راستیان بنجل بکی و بەرووڤاژی بکی.


المقال يعبر عن رأي الكاتب

128