حه‌سه‌كێ.. چه‌ند تاخه‌ك راستی مووشه‌كان هاتن وزارۆكه‌كی ژیانا خوه ژ ده‌ست دا
دوه ئێڤارێ جاره‌كه دن شه‌ر د ناڤبه‌را هێزێن رێژیما سووری و ملیسێن “دفاع الوطني” ده ل چارگۆشه‌یا ئەوله‌هی ل حه‌سه‌كێ ده‌ركه‌ت, د ئەنجامێ ده هه‌ژماره‌ك تاخێن باژێر راستی مووشه‌كان هاتن, خه‌لكێ باژارێ ژی شه‌ڤا خوه د ترسێ ده ده‌رباس كرن.
ل گۆری ژێده‌رێن خوه‌جهی, ئێڤارا بۆری تاخێن العزيزية, دولاب العويص, العمران والناصرة ل باژێر راستی مووشه‌كان هاتن, د ئەنجامێ ده, زارۆكێ 2 سالی یێ ب ناڤێ “زێدان محه‌مه‌د” ژیانا خوه ژ ده‌ست دا, و چه‌ند وه‌لاتی بریندار بوون.
ژێده‌ران سه‌ربار كر ژی, شه‌ر سبه‌ها ئیرۆ راوه‌ستیا, لێ رێبه‌ندێن رێژیمێ ده‌رباسبوونا ئۆتۆمبێلان بۆ تاخا چارگۆشه‌یا ئەوله‌هی قه‌ده‌غه كر, و پرانیا دوكانان تا نها گرتینه.
ل گۆری چالاكڤانان, ژ ده‌ستپێكا شه‌ر ڤه, د ده‌ره‌نگیا ئێڤارا 19ێ ئیلوونێ ده, 10 وه‌لاتی بوونه قوربانی د ناڤ ده زارۆكه‌ك, ژنه‌ك وكه‌سه‌كی ب ته‌مه‌ن هه‌نه.
هه‌مان ژێده‌ران سه‌ربار كر, ته‌ڤی گه‌فێن رێژیمێ ب تۆپبارانكرنا مالا وی, هین ژی "عبد القادر حمو" فه‌رماندارێ ملیسێن “دفاع الوطني” ل مالا خوه دمینێ.
ژ ده‌ستپێكا شه‌رێ حەسەكێ ڤه, ده‌ریێن دبستان و دوكانان ل چارگۆشه‌یا ئەوله‌هی هاتن داخستن, زانینگه‌ها "الفرات" ل باژێر ئەزموونێن خوه‌نده‌كاران پاش خستن, و مالا وه‌لاتی “عمر شیخموس حسین” ب هاونێ هاته تۆپبارانكرن و زیان مادی بوون.
ل حەسەكێ چارگۆشه‌یا ئەوله‌هی د بن كۆنترلا رێژیما سووری ده یه, وده‌ڤه‌رێن دن یێن باژێر د بن كۆنترۆلا رێڤه‌به‌ریا پیدێ ده نه, وهه‌ر ده‌مه‌كێ گرژی و شه‌ر د ناڤبه‌را ئالیێن كو كۆنترۆلا باژێر دكن ده ده‌ردكه‌ڤن وسڤیل باجا نۆكاكیان ددن.
3217
