پەدەكەسێ: بنپێكرنێن پەیەدێ رەوش خرابتر كریە
د 17ێ مه‌ها ئیلوونا 2023یان ده پۆلیتبیرۆیا پارتیا ده‌مۆقراتا كوردستان – سووریا, جڤینا خوه یا ئاسایی ل دار خست, تێ ده پێشهاته‌یێن داویێ ل سه‌ر ئاستا سووریێ و رۆژئاڤایێ كوردستانێ گۆتووبێژ كرن.
د ده‌ستپێكا جڤینا خوه ده, ل سه‌ر ره‌وشا ژیانا وه‌لاتیێن سووریێ, كو ژ به‌ر هه‌ژاری و نه‌بوونێ و بلندبوونا نرخێن پێدڤیێن ژیانێ دنالن, راوه‌ستیان, و ب بلندكرنا پەیەدێ ژ نرخێ كه‌لووپه‌لان نه‌خاسم یا مازۆتێ, ره‌وش خه‌رابتر و زه‌همه‌تر كریه, سه‌رباری كو ره‌وشا ئەوله‌هی ژ بنپێكرنێن پەیەدێ و كریارێن ترساندنێ, نه ئارامە, هه‌ر ده‌م ئەندام و ئالیگرێن ئەنەكەسێ و هه‌ر كه‌سه‌ك دژبری پەیەدێ به, ژ ئالیێ چه‌كدارێن پەیەدێ ڤه, تێنه گرتن و ره‌ڤاندن, هه‌ر وه‌ها دیارده‌یێن نه‌رێنی د جڤاكێ ده وه‌كه ماده‌یێن هشبر, دزی, تاوان و ده‌سته‌رسه‌ركرن و سه‌پاندنا باجێن گران به‌ربه‌لاڤ بوونه, سه‌رباری ره‌ڤاندنا جوان, نووجوان و زارۆكان ژ بۆ له‌شكریا نه‌چار كو ئەو سه‌ده‌مێن ناڤبۆری هه‌موو فشاره‌كێ ل سه‌ر نفشێ جوانان دروست دكن, دا كو روو ل ئە‌ورپایێ و ده‌رڤه‌یی وه‌لێت بگرن.
ده‌ربارێ شه‌رێ قسدێ و هن ئێلێن ئەره‌بان, پەدەكەسێ دایه زانین كو نه قسدێ نوونه‌رتیا كوردان دكه, و نه ژی ئێلێن د شه‌ر ده نوونه‌رتیا ئەره‌بان دكن, و هن ئالی هه‌بوون بابه‌ت گور دكرن و دخوه‌ستن شه‌ره‌كی كوردی – ئەره‌بی بینن مه‌یدانێ, لێ ئەڤ یه‌ك بنگه‌هێن پێكڤه‌ژیانا ئاشتیانه تێك دده و نه ژ به‌رژه‌وه‌ندیا گه‌لان ده یه.
ل سه‌ر ره‌وشا باشوورێ سووریێ و ده‌ركه‌تنا خوه‌پێشاندانان, نیشانا ڤێكه‌تنا ئاگرێ شۆره‌شا سووریێ یه, و دبه سه‌ده‌ما لاوازبوونا رێژیما ئە‌سه‌د, دڤێ عوپۆسیۆنا نشتیمانی, ژێ ره ببه پشته‌ڤان, ژ به‌ر ده‌خوازێن وان د سیسته‌مه‌كه ده‌مۆقرات نه ناڤه‌ندی یان فه‌درالی د جهێ خوه ده یه.
د درێژاهیا جڤینا خوه ده, پەدەكەسێ ل سه‌ر ره‌وشا ئوپۆسیۆنا سووریێ گۆت كو كارێ وێ نه د ئاستا پێویست ده یه, و دڤێ ل خوه ڤه‌گه‌ره و نرخاندنه‌كێ ژ خوه ره ل گۆری پره‌نسیپێن شۆره‌شێ چێبكه, و كه‌دێن جدی ژ بۆ بداویكرنا بنپێكرنان, ل ده‌ڤه‌رێن عە‌فرین, سه‌رێ كانیێ و گرێ سپی بكه, و دیت كو بریارا گه‌نجینه‌یا ئە‌مه‌ریكی ل سزه‌دانا هن كۆمێن چه‌كداران دڤێ كو ببه وانه‌یه‌كه توند و هه‌ر یه‌ك ژ اتیلاف و حكوومه‌تا ده‌مكی ل سه‌ر راوه‌ستن و سینۆره‌كێ ده‌ینن, هه‌ر وه‌ها توندترین سزه ل سه‌ر ئەنجامده‌رێن تاوانا شه‌هیدكرنا 4 ژ مالباتا پێشمه‌رگ ل جندرێسێ شه‌ڤا نه‌ورۆزێ بسه‌پینن.
پەدەكەسێ رۆلا ئەنەكەسێ نرخاند و دیت كو ده‌سكه‌فته‌كه نشتیمانی ونه‌ته‌وی ژ گه‌لی كورد و ته‌ڤگه‌را سیاسی یه, و چاوانیا دیتنا چاره‌سه‌ریان ژ خالێن لاواز د لاشێ وێ ده و چاوانیا ئەكتیڤكرنا چالاكیێن وێ گۆتووبێژ كرن.
د داویا جڤینا خوه ده ل گۆری د داخویانیێ ده هاتیه, پۆلیتبیرۆیا پەدەكەسێ, ل سه‌ر هلمه‌تا ل دژی پارتی وهن سه‌ركره‌یێن وێ سه‌كنی و گۆت كو پارتی و سه‌ركرده‌یێن وێ ژ وێ یه‌كێ مه‌زنترن كو هن كه‌سێن لاواز و كێم بكاربن باندۆرێ ل یه‌كگرتن وێ و رێبازا بارزانیێ نه‌مر ده بكن, ژ به‌ر كو پارتی هێز و ڤیان خوه ژ گه‌لێ خوه وه‌ردگره وو, ژ پابه‌ندبوونا ب رێبازا نه‌مر د ته‌كۆشین, قوربانیدان و دلسۆزیێ ده دستینه.
3582
