بومبيو: ترامپ لیستەیا سزایێن كو وێ ب سەر توركیا دە وەرنە سەپاندن ئیمزەكریە

آرك نيوز...ژ بەر كو توركیا ئێریشی رۆژئاڤایێ كوردستانێ كریە , ئەمریكا وێ سزایێن ئابووری ب سەر توركیا دە وب سەر ژمارەیەك بەرپرسیارێن پلە بلندێن توركیا دە ب سەپینە.

مایك پۆمپیۆ وەزیرێ دەرڤەیێ ئەمریكا د داخویانیەكێ دە راگەهاند كو دۆنالد ترامپ سەرۆكێ ئەمریكا فەرمانەك ژ بۆ سەپاندنا سزایان ب سەر توركیا دە ئیمزە كریە , ئەوژی داكو دەست ب جه ئێریشا خوە ل سەر رۆژئاڤایێ كوردستانێ راوەستینە .

ل گۆری فەرمانا دۆنالد ترامپ سەرۆكێ ئەمریكا , دەستهلات ب وەزارەتا گەنجینە , ووزارەتا دەرڤەیا ئەمریكا هاتیە دان كو دۆرپێچكرن وسزایان ب سەر هەر كەس وئالیەكی دە ب سەپینن كو دەستێ وان د ئێریشا توركیا دە بۆ سەر رۆژئاڤایێ كوردستانێ دە هەیە .

وەكە مایك پۆمپیۆ دبێژە وەزارەتا دەرڤە ووەزارەتا گەنجینەیا ئەمریكا لیستەیا سزایایێن كو وێ ب سەر ژمارەیەك بەرپرسیارێن توركیا دە وەرنە سەپاندن ئامادەكریە , وهەردو وەزیرێن بەرەڤانی ووزەیا توركیا ناڤێن وان د لیستەیێ دە هەیە .

پۆمپیۆ تەكەزكر كو ئێریشێن توركیا بۆ سەر رۆژئاڤایێ كوردستانێ وێ باندۆرەكە نەرێنی ل سەر شەرێ دژی تەرۆرێ ورێخستنا تەرۆرستی یا داعشێ , ول سەر ئارامی وئاساییشا وەلاتیان دروست بكە .

وەزیرێ دەرڤەیێ ئەمریكا هۆشداری دا توركیا وگۆت ئەگەر ئێریش نەوێ راوەستاندن , دەست ب جه توركیا وێ راستی سزاییێن ئەمریكا وەرە .

ژ دەما كو توركیا ئێریشا خوە بۆ سەر رۆژهلاتێ چەمێ فەراتێ كریە , ورۆژانە پێشڤەچوونێن نوو ل سەر عەردێ دروست دبن , وئەمریكا بریار دایە كو هەزار سەربازێن خوە ژ رۆژئاڤایێ كوردستانێ ڤەكشینە , وبەردەوام سەرۆكێ ئەمریكا دبێژە كو ئەمریكا بەشداریێ د شەرێ توركیا وپەیەدە دە ناكە .

241