روسیا وئێران ل سەر دەركرنا ئەمریكا ژ سووریێ رێكەفتنە

آرك نيوز.. رۆژنامەیا واشنتن بۆست یا ئەمریكی ل سەر زارێ بەرپرسیارێن لەشكەری یێن ئەمریكی بەلاڤكریە كو ئێران گرووپەكی ل سووریێ چەكدار دكە تاكو قۆناغا ئێریشكرنێ ل سەر هێزێن ئەمریكی ل سووریێ دەستپێ بكە، ورۆسیا كار ل سەر دەركرنا ئەمریكا ژ سووریێ دكە

ل گۆری كو رۆژنامەیێ ئەشكەرەكریە بەلگەنامەیەك هەیە دەربارێ پلانێن ئێران ورۆسیا ل دژی ئەمریكا ل سووریێ ، وهەردو ئالی ل سەر دروستكرنا ناڤەندەكێ ژ بۆ سەركردایەتیكرنا پلانێن دژی ئەمریكا ل سووریێ رێكەفتنە.

وەكە رۆژنامەیا ئەمریكی دبێژە رۆسیا ب ئاوایەكی راستە راست سەرپەرشتیا هەلمەتا ئێریشێن چەكداری ل سەر هێزێن ئەمریكی ل سووریێ ناكە. وئێران وهەڤپەیمانێن خوە كار ل سەر دروستكرنا هێزەكێ ژبۆ بكارئانینا بۆمبێن تایبەت ب وێرانكرنا ئالاڤێن لەشكەری یێن ئەمریكی دكن.

رۆژنامەیێ گۆتژی كو ئەڤ جۆرە چەك وبۆمب ئێران بەرییا نها وب تایبەتی ل سالێن 2003 وهەتا 2011 ل دژی هێزێن ئەمریكی ل عێراقێ ب كارئانینە، وزیانەك مەزن ب ئارتێشا ئەمریكی گەهاندنە وی دەمی.

هەروەها وێ رۆژنامەیێ گۆتژی كو ئێران جارەكە دن ئەو بۆمب ل رۆژهلاتێ شاما پایتەختا سووریێ دبن سەرپەرشتیا فیلق القدس یێ سەر ب پاسدارێن ئێرانێ ڤە ب كارئانینە، ویەك ژ دروستكەرێن وان بۆمبان ل گەل حزب الله یێ لوبنانی كار دكە و د دەستپێكا سالا 2023 ان ل سووریێ ئەو بۆمب ب كارئانینا.

وەكە پسپۆرێن لەشكەری یێن سووری دبێژن ئەڤ چەك وتەقەمنیێن نوو یێن ئێرانی وێ زیانەكە مەزن ب هێزێن ئەمریكی بگهینن ئەگەر وەرنە ب كارئانین .

هەروەها رۆژنامەیا واشنتن پۆست گۆت ئەڤ رێكەفتنا ناڤبەرا رۆسیا وئێران دە ل دژی ئەمریكا هاتیە كرن ، بەشار الاسد سەرۆكێ رژێما سووریێ پێ رازیە وگەلەك هەول ژبۆ دروستكرنا ڤێ رێكەفتنی دانە.

وەكە رۆژنامەیێ دایەخویاكرن كو رۆسیا وئێران دخوازن تەڤایا ناڤچەیێن سووریێ ڤەگەریێننە بن كۆنترلا رژێما ئەسەدە وب تایبەتی ناڤچەیێن باكوور ورۆژهلاتێ سووریێ كو نها جهێ هەژموونا ئەمریكایە.

رۆژنامەیێ گۆتژی كو یەك ژ پلانان هاندانا خەلكێ سووریێ یە ل دژی ئەمریكا تاكو فشارەك ل سەر ئەمریكا دروست ببە، وئەمریكا نكارە رووبرووێ خەلكێ ببە ، ژ بەر وێ چەند ئەمریكا وێ جهەكی لەشكەری ل سووریێ ئارمانج بكە، وئەڤ یەك وێ ئالیكار بە ژبۆ بجیكرنا پلانێن رۆسیا وئێران ل دژی ئەمریكا ل سووریێ.

221