بەلگەنامەیا رێكەفتنا ناڤبەرا ئەنجومەنا نشتیمانی یا كوردی ل سووریێ و كوالسیۆنا ئۆپۆزسیۆنێ دە

كوالسیۆنا نشتیمانی یا هێزێن شۆرەش و ئۆپۆزسیۆنا سووریێ ژ هەژەمارەك ئالی و كەسایەتێن سیاسی كو نوونەراتیا پێكهاتەیێن سووریێ یێن جۆراجۆر دكن پێك تێ، یەك ژ وان ئالیان ژی ئەنجومەنا نشتیمانی یا كوردی ل سووریێ یە كو ئیرۆ نوونەرێن خوە دناڤا كوالسیۆنا ئۆپۆزسیۆنا سووریێ دە هەنە، جیگرێ سەرۆكێ كوالسیۆنێ ژی نوونەرێ ئەنجومەنا نشتیمانی یە.

بنگەها تەڤلیبوون و كارێ ئەنجومەنا نشتیمانی دناڤا كوالسیۆنا ئۆپۆزسیۆنێ دە لگۆری بەلگەنامەیا رێكەفتنا ناڤبەرا ئەنجومەنا نشتیمانی یا كوردی ل سووریێ و كوالسیۆنا ئۆپۆزسیۆنێ یە، كو رۆژا بیست و حەفتێ تەباغا سالا 2013ان هاتیە ئمزەكرن و ژ شازدە خالان پێك تێ.

-د خالا یەكەم دە هاتیە كو ئئتلافا ئۆپۆزسیۆنێ باپەندە ب دانپێدانا دەستووری ب ناسنامەیا گەلێ كورد یا نەتەوەیی و بمافێن نەتەوەیی یێن گەلێ كورد د چارچۆڤەیا سووریایا یەكگرتی دە ژ ئالیێ گەل و عەردی ڤە.


-خالا دویەم: راهشتنا هەموو سیاسەت و مەراسیم و تەدابیرێن كو لدژی كوردان هاتبوون بجیكرن و باندۆرا وان ژی وەرە چارەسەركرن و زیاندار ژی وەرن قەرەبۆكرن و دوبارە مافێن وان وەرن ڤەگەراندن.

-خالا سێیەم: ئئتلاف تەكەزیێ لسەر وێ یەكێ دكە كو سووریایا نوو وەلاتەكی دیموقراتی سڤیل و فەرهئالی بە، سیستەما وێ جماوەری پەرلەمانی یە و سیستەما نەناڤەندیا ئیداری لگۆری بهێزكرنا دەستهلاتێن خوەجهی دسەپینە.
لسەر ڤێ خالێ ژی د داویا بەلگەنامەیێ دە هاتیە كو ئەنەكەسە ژ ڤێ خالێ نەرازی یە و دبینە كو باشترین سیستەم ژبۆ سووریێ فدرالی یە و ئەنەكەسە دێ ژبۆ بجیكرنا فدرالیێ ژی كار بكە.

د خالا پێنجان دە هاتیە كو سووریە وەلاتەكی پر نەتەو و چاند و ئۆلە، و دەستوورا وێ رێزێ ل پەیمان و بەلگەنامەیێن ناڤدەوەلتی دگرە.

د خالا حەفتەم دە هاتیە كو سووریایا نوو ب سیستەما خوە یا سڤیل و دیموقراتی و ب دەستوورا خوە گەرەنتیا بنگەهینە ژبۆ هەموو پێكهاتەیێن سووریێ یێن نەتەوەیی و ئۆلی و تەڤنا جڤاكی.

د خالا هەشتەم دە هاتیە كو برایێن كورد د چالاكیێن شۆرەشا سووریێ دە ب رێیا هەڤرێز و هێز و پارتیان بەشدار بوون، و گەرەك ب هەمان ئاوایی دناڤا ئئتلافێ دە ژی كارا بن و لگۆری پێدڤیێن قۆناغا ڤەكوهێز ب بەشەداریەكێ لسەر ئاستا نشتیمانی د هەموو واران دە ژی كارا بن.

خالا یازدەهان بەحسا ناڤێ دەولەتا سووریێ دكە كو ئئتلاف ناڤێ سووریێ وەكە یا د سەردەما سەربخوەیێ دە بكارتینە.

خالا دۆزدەهان ژی دبێژە كو ئئتلاف دێ چالاكیان ژبۆ داناسینا دۆزا كوردی ل سووریێ و ئێش و ئازارێن كو وەلاتیێن كورد دیتنە، ب ئارمانجا ئاڤاكرنا چاندەكە نوو ل جەم سووریان ل سەر بنگەها وەكهەڤی و رێزگرتنێ، لداربخە.

د خالا چاردەهان دە ژی هاتیە كو ئەنجومەنا نشتیمانی یا كوردی ل سووریێ نوونەرێن خوە وەكە جیگرێ سەرۆكێ ئئتلافێ و 10 ئەندام دناڤا دەستەسا گشتی دە هەنە هەروەها دوو ئەندامێن ئەنجومەنێ یێن دناڤا دەستەیا گشتی دە ژبۆ دەستەیا سیاسی تێنە هلبژارتن.


د خالا پازدەهان دە ژی هاتیە كو هەری كێم ل گۆری ڤێ رێكەفتنێ كورد دناڤا ئتلافێ دە ب چاردە نوونەرانن، و ئەگەر ژ ڤێ هەژمارێ كێمتر بە وێ دەمێ ئەنەكەسە دكارە نوونەنە دن دەستنیشان بكە داكو بگهێژە وێ رێژەیا كو لسەر هاتیە لهەڤكرن.


د خالا داویێ دە ئانگو خالا شازدەهان هاتیە: دبە كو ئەڤ بەلگەنامە وەرە پێشخستن لگۆری پێویستیا كارێ نشتیمانی و بـ ئەرێكرنا هەردوو ئالیان.

475