رێفراندۆما خوه‌نه‌چه‌ماندنێ
رێفراندۆما خوه‌نه‌چه‌ماندنێ
شێخۆ عەفرینی - رۆژنامەیا كوردستان
25ێ مه‌ها ئیلوونا سالا 2017ان, گه‌لێ كورد بریاره‌كه دیرۆكی ب جی كر, بوویه‌را هه‌ری گرنگ د دیرۆكا گه‌لێ كورد ده یه, بریار و فه‌رمانا سه‌رۆك مه‌سوود بارزانی د ئەنجامدانا رێفراندۆما سه‌رخوه‌بوونا كوردستانێ یه. نه ب ته‌نێ بوویه‌ره‌ك بوو و چوو نا, لێ به‌لێ به‌لگه‌یه‌كه بۆ نه‌ڤیێن نه‌ڤیان, تا بده‌ستخستنا مافێن ره‌وا, گه‌لێ كورد دێ وێ به‌لگه‌یێ د چاڤێن داگیركه‌رێن كوردستانێ ده ده‌رخینن.
سه‌رۆكێ هه‌رێما كوردستانێ د وێ ده‌ما ده سه‌رۆكێ گه‌لێ كورد مه‌سوود بارزانی, د هزه‌رانێ ده ل گه‌ل نوونه‌رێن هه‌موو پارتیان جڤیا, ب هه‌ڤ ره ب یه‌ك ده‌نگی گۆتن: به‌لێ بۆ ئەنجامدانا گشتپرسیا سه‌رخوه‌بوونا كوردستانێ ژ عيراقێ, كو ژ ده‌هێ سالان ڤه نه‌دپه‌ژراندن كو ببن هه‌ڤپار و هه‌ڤالبه‌ند, لێ به‌لێ هه‌رده‌م كورد وه‌كه دوژمن دتینن. ل سه‌ر فه‌رمانا سه‌رۆكێ كوردستانێ, گه‌لێ كورد ژ خانه‌قینێ تا ب زاخۆكا ده‌لال ب مه‌لیۆنان ئەو بریار ب دله‌كی فه‌ره‌ه وه‌رگرتن, و سه‌رۆكێ هێژا ب ته‌نێ نه‌هشتن.
بێگومان هه‌رسێ په‌رچه‌یێن دن نه‌خاسم كوردێن رۆژئاڤایێ كوردستانێ و ره‌ڤه‌ندا كوردی ل ئە‌ورۆپایێ كێماسی نه‌كرن, ب ڤین و ڤیانا خوه به‌شداری د پشته‌ڤانیا بریارێ ده كر.
ئه‌م دكارن ببێژن كو رێفراندۆما سه‌رخوه‌بوونا كوردستانێ پرۆسه‌یا هه‌ری سه‌ركه‌فتی ل سه‌ر ئاستا جیهانێ بوو, ژ به‌ر كو رێژه‌یا به‌شداربوویان 4 مه‌لیۆن كه‌س ده‌رباس كر, ژ وان كه‌سان 92,7 ل سه‌ر سه‌دی گۆتن به‌لێ بۆ گشتپرسیا سه‌رخوه‌بوونا كوردستانێ, به‌لێ بۆ كوردستانه‌كه ئازاد, سه‌ربه‌ست و سه‌ربخوه.
گه‌لۆ دڤێ كورد پاشیمان ببن؟
پشتی كو كوردان پرۆسه ئەنجام دا, و ئەنجامێن رێفراندۆمێ ده‌ركه‌تن, چاڤێ دوژمنان بار نه‌بوون, دیسا ئێریشی قه‌وا‌رەیا كوردستانێ كر, ژ به‌ر خیانه‌تا 16 جۆتمه‌هێ, كوردان, كه‌ركووكا دلێ كوردستانێ و ده‌ڤه‌رێن دن ده‌ردان و ژ ده‌ست دان, تا رۆژا ئیرۆ ژی ئەم باجا وێ خیانه‌تێ كو ژ به‌شه‌كێ ژ پارتیا یه‌كیتیا نشتیمانیا كوردستانێ یەنەكێ د ده‌رمافێ دۆزا كوردی ده كرنه, ددن.
ئه‌نده‌زیارێ سه‌رخوه‌بوونا كوردستانێ سه‌رۆك مه‌سوود بارزانی, د پرتووكا خوه بۆ دیرۆك و لێدوانێن خوه ده ته‌كه‌ز كریه, كو ئەو ل سه‌ر وێ بریارێ نه‌پاشیمانە, ئەگهر گشتپرسیه‌كه دن هه‌به ئەوێ یه‌كه نوو ل سه‌ر گه‌ل چێ بكه كا گه‌ل پاشیمانن یا نا.
رۆژدبوونا سه‌رۆك ل سه‌ر ئەنجامدان وێ رێفراندۆمێ, جاره‌كه دن پشتراست كو نه‌چه‌ماندن پارا كوردانە, د سالڤه‌گه‌را 5 یا رێفراندۆما سه‌رخوه‌بوونا كوردستانێ دا سه‌رۆك مه‌سوود بارزانی جاره‌كه دن گه‌لێ كورد هان دا, كو چیا ل به‌ندا مه نه, ئەم خوه نه‌چه‌مینن و ئەمێ خوه نه‌چه‌مینن, جاره‌كه دن ته‌كه‌ز كر كو كورێ جه‌نیرال بارزانیێ نه‌مرە, نه‌ڤیێن شێخ ئە‌هه‌مد و شێخ ئە‌بدولسه‌لامە, وه‌كه چاوا باڤ و باپیرێن وی سه‌رێ خوه ژ داگیركه‌رێن.ئوسمانیان, سه‌فه‌ویان, بریتانیان, و ده‌سهه‌لاتدارێن ئیراقێ ره نه‌دانی, سه‌رۆك ژی ئەو رێ ژ خوه ره هلبژارتیه, رێیا نه‌چه‌ماندنێ, رێیا ئازادیا كوردستانێ, رێیا سه‌ربه‌ستی و سه‌رفرازیێ, رێیا ئاشتیخوازیا گه‌لان, رێیا براتیا ئول و پێكهاته‌یان, رێیا سه‌رخوه‌بوونا كوردستانێ.
سه‌رۆكێ گه‌لێ كورد د سالڤه‌گه‌را 5ان یا گشتپرسیا سه‌رخوه‌بوونا كوردستانێ ده هن هه‌لبه‌ست ژ هه‌لبه‌ستڤانێ ئەره‌ب یێ تۆنسی ئە‌بوو قاسم ئە‌لشابی ئانی و گۆت: ئەگهر گه‌ل ژیانێ بخوازێ, رۆژه‌كه وه‌ره قه‌ده‌ر دێ به‌رسڤێ بده. وپشتراست كر: ئیرۆ رۆژه‌كه دیرۆكی یه, من چ ئاخافتنه‌كه دن نین ئە ئیرۆ ژ وه ره ببێژم ژ بلی وێ یه‌كێ دبێژم ده‌ست و چاڤێ وان ماچ دكم كو خوه نه‌چه‌ماندن و خوه ناچه‌مینن, میله‌تێ مه قوربانیه‌كه زێده دایه, مه خوینه‌كه زێده دایه, شه‌هیدێ مه گه‌له‌ك بقه‌در ن, خوینا وان گه‌له‌ك بقه‌در ئە, نابێ ئەم رێ بدن دوژمن و نه‌هه‌زێن مه دلێ خوه ب وێ یه‌كێ خوه‌ش بكن ئیرۆ ببێژن "مه ڤیانا وه شكاند" ژ به‌ر كو ئەگهر ڤیانا مه شكیا, مه هیچ قه‌در و بوهایه‌ك نامینێ و ئەو ده‌ستكه‌فتێن هه‌نه ژی ئەو ژی ژ ده‌ست دچن.
المقال يعبر عن رأي الكاتب
419
