تاهر: پروژه‌يا ئيرانى هێلا ئه‌مه‌ريا ل سه‌ر سينورێ عراق وسووريێ بمينه
سه‌ركرده‌یه‌كی كورد راگهاند كو هه‌بونا ئیرانى د ده‌ڤه‌رێ ده و هه‌ولێن وێ ژ بو ڤه‌كرنا ده‌رگه‌هه‌كی ژ ته‌هران هه‌تا به‌غداد وشام وبیروت هشت كو ئه‌مه‌ریكا ل ده‌ڤه‌رێ بمینه بتایبه‌ت ل سه‌ر سینورێ دناڤبه‌را عراق وسووریا ده .
ئه‌ندامێ پولیتبیرویا پارتی دیموقراتی كوردستان سوریا وسه‌روكێ ئه‌نجومه‌نێن خوجه‌هی یێن ئه‌نجومه‌نا نشتمانى كورد ل سووریێ محسن تاهر ژ مالپه‌را باس نیوز ره راگهاند كو هه‌ولێن ئیرانی ب به‌رفره‌هبونێ هشت كو ئه‌مه‌ریكا ل ده‌ڤه‌رێ بمینه كو بگوتنا وی مانا ئه‌مریكی ل سووریێ نه بته‌نێ ژ به‌ر شه‌رێ داعشێ یه لێ ژ به‌ر رێگری ل به‌رفره‌هبونا ئیرانى د ده‌ڤه‌رێ ده ونه جیبه‌جیكرنا پروژه‌یا ئیرانی د ده‌ڤه‌رێ ده يه .
تاهر دیاركر كو هین هه‌لوه‌ستا ئه‌مریكى ده‌ربارێ ده‌ڤه‌را ئارام زه‌لال نه‌بویه ژ به‌ر كو ئه‌و ده‌ڤه‌ر وێ وه‌ره ئاڤاكرن ل گوری به‌رجه‌وه‌ندیێن ئه‌مریكی , له‌وما نه دیاره گه‌لو ئه‌ڤ پروژه وێ هه‌رێمه‌ك تایبه‌ت ب كورد وپێكهاته‌یێن ده‌ڤه‌رێ ب سه‌رپرشتیه‌ك ئه‌مریكی ل خوه بگره یان نا .
تاهر ئه‌شكه‌ره كر كو ته‌ڤێ چه‌كدارێن په‌یه‌دێ ب هه‌زاران شه‌هید وقوربانی د شه‌رێ داعشێ ده دان , لێ ڤێ یه‌كێ نه هشت كو ئه‌مه‌ریكا پشتگریا وان ب شیوه‌یه‌كی جدی بكه وهه‌ول بده كو هه‌رێمه‌ك كوردی ل گوری هیڤی و داخوازیێن كوردان ئاڤا بكه .
تاهر هه‌روه‌ها دا زانین كو ئه‌و كه‌سێ پێشبینی دكه كو وێ كریزا سووریێ د ده‌مه‌كه نیزیك ده چاره‌سه‌ر ببه شاشه , هه‌روه‌ها شاشه ئه‌و كه‌سێ باوه‌ر دكه كو وێ رێژیم پابه‌ندیێ ب بریاریێن ناڤده‌وله‌تى بكه , كو بگوتنا وی ئه‌ڤ ئارامیا ده‌مكی یا كو ل سووریێ په‌یدا بویه گه‌له‌كی درێژ ناكه وبێگومان وێ ته‌ڤلهه‌ڤی دناڤبه‌را هێزێن ده‌ڤه‌رێ په‌یدا ببه .
333
