سووریا .. ژ سالا 2011 ان ڤە وهەتا وەكە ئیرۆ 371 هەزار و 222 كەس هاتنە كوشتن

سووریا .. ژ سالا 2011 ان ڤە وهەتا وەكە ئیرۆ 371 هەزار و 222 كەس هاتنە كوشتن

Mar 16 2019

آرك نيوز..ب بۆنەیا هەشتەمین سالرۆژا دەستپێكرنا شۆرەشا سووریێ , رەوانگەها سووریێ یا مافێ مرۆڤان ژمارەیا كوشتیێن شۆرەشێ وجەنگا سووریێ بەلاڤكر .

د رۆژا 15 ئادارا سالا 2011 ان دە وەلاتیێن سووریێ ل دژی رژێما ئەسەد دەست ب شۆرەشێ كرن , هەر چەند شۆرەش ئاشتیانە بوو لێ شۆرەش بەرەڤ چەكداربوونێ ڤە چوو , ودئەنجامێ دە ب دەهان گرووپێن چەكدار یێن تووندرەو وتەرۆرست دروست بوو , وشەرێ ناڤخۆیی ناڤبەرا گرووپێن چەكدار یێن سەر ب ئۆپۆزسیۆنێ ڤە ژ ئالیەكی ڤە ورژێما ئەسەدا دكتاتۆر ژ ئالیەكی دنڤە دەستپێكر , ودئەنجامێ ب سەدان هەزار وەلاتی وچەكدار هاتنە كوشتن .

رەوانگەها سووریێ یا مافێ مرۆڤان ب بۆنەیا هەشتەمین سالرۆژا شۆرەشا سووریێ ئامارێن هەری داوی یێن كوشتیێن شۆرەشێ وجەنگا سووریێ بەلاڤكر , ولگۆری كو رەوانگەهێ بەلاڤكر ژ سالا ( 2011 ) ان ڤە وهەتا وەكە ئیرۆ ب گشتی 371 هەزار و 222 كەس هاتنە كوشتن .

ژ وێ ژمارەیا گشتی 112 هەزار وەلاتیێن سڤیلن .. و بهتر ژ 21 هەزار زارۆك , و 13 هەزار ژن بوونە قوربانی وژیانا خوە ژ دەست دانە.

هەروەها ل گۆری رەوانگەهێ بەلاڤكری 125 هەزار چەكدارێن رژێما ئەسەد ومیلیسیێن ب سەرڤە هاتنە كوشتن , و 67 هەزار چەكدارێن گرووپێن ئۆپۆزسیۆنا سووریێ وچەكدارێن سووریا دیموكراتیك هاتنە كوشتن.

رەوانگەها سووریێ دازانین كو 66 هەزار چەكدارێن رێخستنا تەرۆرستی یا داعشێ ژی ل سووریێ هاتنە كوشتن .

ئەڤ ژمارەیا كو رەوانگەها سووریێ یا مافێ مرۆڤان بەلاڤكری ئامارێن كەسێن كو د زیندانێن رژێما ئەسەد دە هاتنە كوشتن , وئەو كەسێن هینا د زیندانێن رژێما ئەسەد دەنە وچەندین حالەتێن جۆر ب جۆر یێن كو نەهاتنە تۆماركرن ل خوە ناگرە .

ز.ح

302