نه‌ته‌وێن يه‌كگرتي : زێده‌تر ژ سێ سه‌د و سيه هه‌زار كه‌سێن سڤيل ژبر شه‌رێ ل ده‌رعايێ ده‌ربده‌ربوونه
ArkNews :د به‌رده‌واميا پرۆسه‌يا له‌شكه‌ري يا رێژێما ئه‌سه‌د ب پشته‌ڤانيا مليسێن ئيرانێ و باله‌فرێن رووسيێ بۆ كۆنترۆلكرنا ده‌رعايێ ل گۆري نه‌ته‌وێن يه‌كگرتي هه‌ژمارا كه‌سێن كو ژ شه‌ر ره‌ڤيانه گهشتيه زێده‌تر ژ سێ سه‌د و سيه هه‌زار كه‌سێن سڤيل ...و ژئاليه‌كي دن ڤه هه‌ژماره‌ك سه‌ركرده‌يێن ئارتێشا ئازاد و هن به‌رپرسێن رووسي ل باژارێ بوسرا ئه‌الشام جڤينه‌ك بداوي ئانين لێ تا نها تو رێكه‌فتن ئيمزه‌نه‌كرنه.
رێژێما ئه‌سه‌د ب پشته‌ڤانيا مليسێن ئيرانێ و باله‌فرێن رووسيێ د پرۆسه‌يا خوه يا له‌شكه‌ري ده بۆ ده‌سته‌سه‌ركرنا ده‌ڤه‌رێن ژێر كۆنترۆلا ئۆپۆزيسيۆنا سووريێٍ ده ل ده‌رعايێ به‌رده‌وامه ..
ب ده‌ستپێكرنا مه‌زنترين پرۆسه‌يا كۆچبه‌ركرنێ ژ ده‌رعايێ ل باشووري رۆژئاڤايێ سووريێ نه‌ته‌وێن يه‌كگرتي راگهاند كو هه‌ژمارا كه‌سێن كو ژ شه‌ر ره‌ڤيانه گهشتيه زێده‌تر ژ سێ سه‌د و سيه هه‌زار كه‌سێن سڤيل .
فه‌رحان حه‌ق جيگرێ به‌رده‌ڤكێ بناڤێ ئه‌ميندارێ گشتي يێ نه‌ته‌وێن يه‌كگرتي راگهاند كو نێزيكي سێ سه‌د و سيه هه‌زار كه‌سێن سڤيل ژ به‌ر ئێريشێن به‌ژايي و ئاسيمانيێن توند ژ ئاليێ رێژێما سووريێ ڤه ل سه‌ر ده‌رعايێ ل باشووري رۆژئاڤايێ سووريێ ره‌ڤيانه و مه‌زنترين پرۆسه‌يا كۆچبه‌ركرنێ ده‌ستپێكريه.
حه‌ق دا خوياني كو ئۆفيسا نه‌ته‌وێن يه‌كگرتي يا هه‌ڤرێزكرنا كاروبارێن مرۆڤي ..ئۆتشا..ئه‌م ب به‌رده‌واميا ئێريشێن توند يێن رێژێما ئه‌سه‌د يێن به‌ژايي و ئاسيماني ل سه‌ر گه‌له‌ك ده‌ڤه‌ران ل ده‌رعايێ ئاگاهدار كرنه و ئاماژه‌كر كو هه‌ژماره‌ك وه‌لاتێن سڤيل بوونه قورباني و بريندار بوونه بێ كو هه‌ژمار وه‌ره ده‌ستنيشانكرن و گۆت ژي كو ئه‌ڤه مه‌زنترين پرۆسه‌يا كۆچبه‌ركرنێ يه ژ ده‌ستپێكا ئێريش و شه‌رێ ل سه‌ر ده‌رعايێ ..
حه‌ق سه‌رباركر كو ب كێمايي دوازده‌ه زارۆك و دو ژن و پيره مێره‌ك ژبه‌ر نه‌خوه‌شي و تي بوونێ و پێڤه‌دانا تووپشكان ل نێزيكي سينرێن ئوردونێ ژيانا خوه ژ ده‌ست دايه .
ژ ئاليه‌كي دن ڤه ..ره‌وانگه‌ها سووري يا مافێ مرۆڤان راگهاند كو ل ده‌ردۆرا ده‌ڤه‌را المه‌حجه يا باكورێ ده‌رعايێ ژي كو دبن كۆنترۆلا رێژێما ئه‌سه‌د ده‌يه ته‌قينه‌كه توند ده‌ڤه‌را بارگه‌هێن له‌شكه‌ري يێن رێژێما هه‌ژاند لێ تو زانياريێن زه‌لال ل سه‌ر زيانيێن مرۆڤي تونه‌نه وهه‌ر وه‌ها ئه‌گه‌ر ئه‌وو ته‌قين ژ ئه‌نجاما ئارمانجكرنا هێزێن ئۆپۆزيسيۆنێ يه ئانگۆ ژبه‌ر كێشه‌يه‌كه ته‌كنيكيا نۆرماله .
هه‌ر دڤێ ده‌ربارێ ده مالپه‌را شام ل سه‌ر زارێ ئۆده‌يا پرۆسه‌يێن ناڤه‌ندي ل باشوورێ سووريێ راگهاند كو هێزێن ئۆپۆزيسيۆنێ رێ ل به‌ر پێشكه‌تنا چه‌كدارێن رێژێمێ و مليسێن شيعي يێن كو پشته‌ڤانيا وان دكن ل به‌ره‌يێن تل السه‌من و تابلين ل گونده‌وارێ باژارێ ته‌فه‌س گرتن و خه‌فكه‌ك ژ وان ره ڤه‌دان وتێده زێده‌تر ژ چل وپێنج جه‌كارێن رێژێمێ و مليسێن ئيراني كوشتن.
هه‌ر وه‌ها ئۆده‌يا پرۆسه‌يێن ناڤه‌ندي ل باشوورێ سووريێ راگهاند كو وان زريپۆشه‌كه شێلكا و يه‌كه دن ژ جۆره‌يا بي ئيم بێ و دو ئۆتۆمبيلێن زيل و هايلۆكس وتانكه‌ك تێكبرنه
هه‌ر ده‌ربارێ ده‌رعايێ ..ژێده‌رنه سووري يێن خوه‌جه‌هي ئه‌شكه‌ره كرن كو هه‌ژماره‌ك سه‌ركرده‌يێن ئارتێشا ئازاد و هن به‌رپرسێن رووسي ل باژارێ بوسرا ئه‌الشام ل رۆژهلاتێ ده‌رعايێ جڤينه‌ك ده‌ربارێ ده‌رعايێ بداوي ئانين ..و دوێ جڤينێ ده گهشتنه هن خالێن هه‌ڤبه‌ش لێ تا نها تو رێكه‌فتن ئيمزه‌نه‌كرنه.
ژ به‌ريا دو حه‌فته‌يان ڤه هێزێن رێژێما ئه‌سه‌د ب پشته‌ڤانيا مليسێن ئيرانێ و باله‌فرێن رووسيێ پرۆسه‌يه‌كه له‌شكه‌ري بۆ ده‌سته‌سه‌ركرنا ده‌ڤه‌رێن ژێر كۆنترۆلا ئۆپۆزيسيۆنا سووريێٍ ده ل باشووري سووريێ ده‌ستپێكريه و د ئه‌نجاما پرۆسه‌يێ ده تا چارێ مه‌ها حه‌فتان دو هه‌زار و حژده‌هان نێزيكي سێ سه‌د كه‌سێن سڤيل بوونه قورباني و ب سه‌دان بريندار بوون .
ع.ع
484
