داخويانيا ئه‌نه‌كه‌سێ د بيرئانينا يه‌كێ يا ده‌رباسبونا توركيا ژ بو عه‌فرينێ
ئه‌نجومه‌نا نشتمانى یا كورد ل سووریێ داخویانیه‌ك ب بونه‌یا ده‌رباسبونا ساله‌كێ ل سه‌ر ده‌رباسبونا توركیێ ژ بو باژارێ عه‌فرینا كوردستانا سووریێ به‌لاڤ كر .
د داخویانیا ئه‌نه‌كه‌سێ ده هاتیه كو ژ بلى ئێش وئازارێن كو خه‌لكێ عه‌فرینێ به‌ریا نه‌ها دیتنه , نه‌ها ئه‌و ئێش وئازار بێهتر بون ژ به‌ر كریارێن گروپێن چه‌كدارێن یێن كو ده‌رباسى عه‌فرینێ بون ب ناڤێن جودا , كو بته‌نێ ل سه‌ر دژمناتیا كوردان لهه‌ڤ دكن , وبته‌نێ رامانێن دزی و وێرانكرنا مالێن خه‌لكێ وكوشتنێ د سه‌رێ وان ده‌یه , كو ئه‌ڤ یه‌ك دورن ژ هه‌مو پرنسیبێن مروڤی.
ئه‌نه‌كه‌سێ هه‌روه‌ها دیاركر كو ته‌ڤی شه‌رمه‌زاركرنا به‌رده‌وام ژ ڤان كریاران ره ژ ئالیێ رێخستنێن مروڤی ویاسایی لێ ئه‌ڤ بنپێكرن هین به‌رده‌وامن وروژ ب روژ بێهتر دبن بتایبه‌ت بنچاڤ كرن ودزى وگوشتن وشه‌وتاندنا زه‌ڤیێن زه‌یتونان هه‌روه‌ها ونداكرنا دێروك وكلتورێ كوردى كو ئارمانجا وان هه‌بونا كوردى ل عه‌فرینێ وندا بكن .
هه‌روه‌ها رێ نه‌دان خه‌لكێن عه‌فرینێ یێن كو ده‌ربه‌ده‌ر بون كو ڤه‌گه‌رن مالێ نخوه كو ل جهێ وان خه‌لكێن ده‌ڤه‌رێن دن ئانی ولمالێن وه‌لاتێن كورد بجه كرن و ئه‌و وه‌كو خه‌لكێن ده‌ڤه‌رێ توماركرن ب ئارمانجا گوهه‌رتنا دیموغرافی د ده‌ڤه‌رێ ده .
ئه‌نجومه‌نا نشتمانى یا كورد ل سووریێ ئه‌ڤ كریار شه‌رمه‌زار كر هه‌ڤده‌مى بێ ده‌نگیه‌ك ناڤده‌وله‌تى وپشخت گوهستنه‌ك توركى وداخواز ژ جڤاكا ناڤده‌وله‌تى وتوركیا و رێخستنێن ناڤده‌وله‌تى ونه‌ته‌وێن یه‌گرتى كو ل پێشیا ڤان كریاران راوه‌ستن و وان گروپێن چه‌كدار ژ عه‌فرینێ ده‌رخینن وباژار راده‌ستی خه‌لكێن وێ یێن ره‌سه‌ن وه‌ره كرن ب سه‌رپرشتیه‌ك ناڤده‌وله‌تى .
د داویا داخویانیێ ده ئه‌نه‌كه‌سێ داخوازا دیتنا چاره‌سه‌ریه‌ك گشتى ژ كریزا سووریێ ره كو تێده هه‌مو گروپێن بیانى ژ سووریێ ده‌ركه‌ڤن و سوریایه‌ك دیموقرات ژ هه‌مى سوریان وه‌ره ئاڤاكرن كو د ده‌ستورێ ده مافێ هه‌می پێكهاته‌یان وه‌ره جیبه‌جیكرن .
303
