دەستەیا سەرۆكاتیا پەرلەمانێ كوردستانێ هاتە هلبژارتن

آرك نيوز...دوه دوشەمێ دەم ژمێر ( 3) پشتی نیڤرۆیێ زەنگێ روونشتنا پەرلەمانی كوردستانێ لێدا , ود روونشتنێ دە دەستەیا سەرۆكاتیا پەرلەمانێ كوردستانێ هاتە هلبژارتن.

پشتی دەستپێكرنا روونشتنا پەرلەمان پرۆسەیا دەنگدانێ ل سەر هلبژارتنا دەستەیا سەرۆكاتیا پەرلەمانێ كوردستانێ هاتە ب رێڤەبرن , وهەر د هەمان روونشتنێ دە دەنگ هاتنە جوداكرن , وناڤێن سەرۆكێ پەرلمان وهەردو جێگرێن وی هاتە راگەهاندن .

ل گۆری پرۆسەیا دەنگدانێ , دكتۆرە ڤالا فەرید پەرلەمانتارا سەر ب فراكسیۆنا پارتی دیموكراتی كوردستان ڤە ( 64 ) دەنگ ب دەستڤە ئانین وبوو سەرۆكا پەرلەمانێ كوردستانێ , و سیپان سالم پەرلەمانتارا فراكسیۆنا نەوەی نووێ خوە ژ بۆ پۆستا سەرۆكێ پەرلەمان بەربژێر كربوو , لێ ب تەنێ هەشت دەنگ ب دەستڤە ئانین .

هێمن هەورامی پەرلەمانتار ژ فراكسیۆنا پارتی دیموكراتی كوردستان بوو جێگرێ یەكێ یێ سەرۆكێ پەرلەمانێ كوردستانێ , و( 68 ) دەنگ ب دەستڤە ئانین , ول هەمبەر دە كاوە عبد القادر بەربژێرێ فراكسیۆنا نەوەی نووێ ب تەنێ هەشت دەنگ ئانین .

هەروەها مونا قەهوەچی پەرلەمانتارا ل سەر پێكهاتەیا توركمان ( 60 ) دەنگ ب دەستڤە ئانین , وبوو جێگرا دووێ یا سەرۆكێ پەرلەمانێ كوردستانێ , ول هەمبەر دە موژدە محموود ژ فراكسیۆنا نەوەیی نوێ ب تەنێ هەشت دەنگ ب دەستڤە ئانین .

پۆستا سەرۆكێ پەرلەمانێ كوردستانێ ل گۆری ل هەڤكرنا سیاسی , پشكا فراكسیۆنا یەكیتی نشتیمانی كوردستانە , وژ بەر كو هەتا نەها یەكیتی نشتیمانی كوردستان نكاریە بەربژێرێ خوە ژ بۆ پۆستا سەرۆكێ پەرلەمان دەستنیشان بكە , دكتۆرە ڤالا فەرید ب دەمكی بووە سەرۆكا پەرلەمانێ كوردستانێ هەتا كو یەكیتی نشتیمانی كوردستان خوە یەك ئالی بكە .

ژ ( 6/11/2018 ) ان ڤە پەرلەمانتارێن كوردستانێ سووندا یاسایی خوارنە , وژ بەر بەرژەوەندیا گشتی روونشتنێن پەرلەمانێ كوردستانێ ب ڤەكری مان هەتا كو یەكیتی نشتیمانی كوردستان بكاربە بەربژێرێ خوە دەشتنیشان بكە , لێ پشتی دەرباسبوونا ( 3 ) مەهان , دوه روونشتنا پەرلەمانێ كوردستانێ هاتە ل دارخستن .
ز.ح

656