رێژیما سووریێ یاسایەكە رێپێدان بۆ زەواجا زارۆكان و بەردانا مێرێ گرتی یان كۆچبەربوویی دەرخست

رێژیما سووریێ یاسایەكە نوو دەرخست كو تێ دە رێددە زەواجا ژێر هژدە سالی، هەروەها رێددە ژنا سووریێ كو داخوازا بەردانێ ژ مێرێ خوە یێ گرتی یان كۆچبەربووی بكە.

رۆژا یەكشەمێ دەهێ سباتێ ، سەرۆكێ رێژیما سووریێ بەشار ئەلئەسەد یاسایا ژمارە 4 یا سالا 2019ان دەرخست كو تێ دە هن گوهەرتن لسەر یاسایا رەوشێن كەسایەتی یا سووریێ یا ژمارە 59 یا سالا 1953ان و گوهەرتنێن وێ پێك تینە.

د بەندێ 18 /مۆڤكا یەك ژ وێ یاسایێ وەها هاتیە:

هەگەر كەچ یان كورێ رەوال ئانگو موراهق، ئدعاءا گهاییێ ئانگو بلوغێ پشتی تمامكرنا پازدە سالان بكە، و داخوازا زەواجێ كر، وێ دەمێ ، ئەگەر دادوەر دبینە كو ئدعاءا وان راستە، و مافێ زەواجێ دزانن، دادوەر رێ ددە وێ زەواجێ پێك وەرە.

كو ل گۆری وێ یاسایێ ئێدی زەواجا ژێر هژدە سالی ب دادوەر ڤە گرێدایی یە.

ل سووریێ د هەیاما حەفت سالێن بۆری دە بهەزاران ژ كەج و كورێن ژێر هژدە سالی زەواج كرنە، و ئەو یەك ژی ل گۆری یاسایێن ناڤدەوەلتی و مافێن زارۆكان، قەدەغەیە و بنپێكرنەكە.

هەر د وێ یاسایێ دە، بەندا 109، مۆڤكا 1 و 2، رێ ددە ژنا سووریێ كو داخوازا بەردانێ ژ مێرێ خوە یێ گرتی یان یێ ژ وەلێت دەركەتیە، بكە.
مۆڤكا یەك وەها دبێژە:
ئەگەر مێر بهتری سالەكێ نەئامادەبوو، مافێ ژنێ هەیە كو داخوازا بەردانێ بكە، وەكە زەرەمەند ژبەر نەئامادەبوونا وێ، تەڤی كو ئەو مێر خوەدی ئابۆریەكە باش بە، و پەرەیان ددە ژنا خوە ژی.

مۆڤكا دویەم:
ئەگەر مێر راستی دادگەهكرنێ بهتری سێ سالان زیندانكرن هات، وێ دەمێ ژ مافێ ژنێ یە پشتی شەش مەهان داخوازا بەردانێ بكە، وەكە زەرەرمەند ژ نەئامادەبوونا وی، تەڤی كو ئەو مێر خوەدی ئابۆریەكە باش بە، و پەرەیان ددە ژنا خوە ژی.

مالپەرا فەیسبووك یا سەرۆكاتیا ریژیما سووریێ پەسنێ وی یاسایێ ددە، و دبێژە ئەو یاسا گونجاوە ب رەوشا نها یا سووریێ و جڤاكا سووریێ.

ل سووریێ ب دەه هەزاران دژبەرێن سووریێ د زیندانێن رێژیما ئەسەد دەنە، هەروەها ژبەر رەوشا سووریێ ب سەد هەزاران ژ وەلاتیێن سووریێ دەركەتنە وەلاتێن دەردۆر و دوور، و ل بەندا تەدابیرێن دانهەڤا مالباتێ نە، لێ لگۆری وێ یاسایی ئێدی ژمافێ ژنێ یە داخوازا بەردانێ بكە.

349