ژ بۆ ڤەگەرا لەشكەرێ رۆژ گۆتووبێژی ل گەل رۆسیا تێ كرن

آرك نيوز ... رۆژنامەیەكە عەرەبی ئەشكەرەكر كو ژ بۆ ڤەگەرا لەشكەرێ رۆژ بۆ رۆژئاڤایێ كوردستانێ سەركردەیەكی هەڤپەیمانیا نشتیمانی یا ئۆپۆزسیۆنا سووریێ وێ ل گەل رووسیا گۆتووبێژیێ بكە .

رۆژنامەیا شرق الاوست د راپۆرتەكێ دە ئەشكەرەكر كو احمد الجربا سەركردەیێ پلە بلندێ هەڤپەیمانیا نشتیمانی یا ئۆپۆزسیۆنا سووریێ كو پشتەڤانیا ئاڤاكرنا ناڤچەیا ئارام ل رۆژئاڤایێ كوردستانێ دكە , وێ ل گەل بەرپرسیارێن رۆسیا وێ گۆتووبێژیێ ژ بۆ ڤەگەرا لەشكەرێ رۆژ بۆ رۆژئاڤایێ كوردستانێ بكە .

رۆژنامەیا شرق الاوست د راپۆرتا خوەدە كو ئیرۆ چارشەمێ هاتیە بەلاڤكرن گۆت : احمد الجربا پێشنیار كریە كو هێزێن توركیێ دەرباسی ناڤا خاكا سووریێ نەبن , ئەگەر ناڤچەیا ئارام ل رۆژئاڤایێ كوردستانێ وەرە ئاڤاكرن , و ب تەنێ پاراستنا ناڤچەیا ئارام ئەركێ هێزێن النخبە ولەشكەرێ رۆژ بە .

هەروەها رۆژنامەیا ناڤ هاتی گۆت كو احمد الجربا بەرپرسیارێ پلە بلندێ هەڤپەیمانیا نشتیمانی یا ئۆپۆزسیۆنا سووریێ وێ ل گەل سێرجی لاڤرۆف وەزیرێ دەرڤەیێ رووسیا بجڤە , ووێ پێشنیارا ڤەگەرا لەشكەرێ رۆژ بۆ رۆژئاڤایێ كوردستانێ , پێشكێشكی وەزیرێ درەڤەیێ رۆسیا بكە .

بەریا چەند رۆژان شاندەكە دەستەیا دانوستاندكارا سووری كو ژ دكتۆر نەسر ئەلحەریری و عەبدولجەبار ئەلعگێدی و قاسم ئەلخەتیب و روبا حەبووش و هەر یەك ژ ابراهیم برۆ و حەواس عەگید پێك دهات سەردانا هەرێما كوردستانێ كرن ، ول گەل سەرۆك بارزانی جڤیان ، و دلێدوانێن تایبەت دە بۆ ئاركێ ژمارەیەك ئەندامێ شاندا دەستەیا دانوستاندكارا سووریێ ئەشكەرەكرن كو مژارا ڤەگەرا لەشكەرێ رۆژ بۆ رۆژئاڤایێ كوردستانێ هاتە گۆتووبێژكرن ، وڤەگەرا لەشكەرێ رۆژ وێ فاكتەرێ ئەولەهی وئارامیا ناڤچەیا ئارام بە .

مژارا ڤەگەرا لەشكەرێ رۆژ بۆ رۆژئاڤایێ كوردستانێ بووە مژارا رۆژەڤێ , وتەڤایا شرۆڤەكارێن سیاسی دبیژن پێویستە لەشكەرێ رۆژ رۆلەكە گرینگ د پاراستنا ئەولەهیا ناڤچەیێ دە ببینە , وخەلكێ رۆژئاڤایێ كوردستانێ ب ڤەگەرا لەشكەرێ رۆژ بۆ خاكا وەلات دل خوەشن .
ز.ح

676