ئەمریكا: جارەكە دن داعش وێ ب هێز ببە

آرك نيوز...مەدیایێن ئەمریكا ل سەر زارێ ژێدەرەكی ئاگەهدار بەلاڤكر كو رەشنڤیسەك گەهشتیە دەستێ وەزارەتا بەرەڤانیا ئەمریكا وتێدە هۆشداریا ڤەگەرا رێخستنا تەرۆرستی یا داعشێ ژ بۆ تەڤایا ناڤچەیێن كو بەریا نها كۆنترۆل كربوون دا .

ل گۆری زانیاریێن رەشنڤیسێ ئەشكەرەكری , ئەگەر فشار ل سەر رێخستنا تەرۆرستی یا داعشێ دروست نەبە , د دەما ( 6 – 12 ) مەهێن بێدە رێخستنا تەرۆرستی یا داعشێ وێ جارەكە دن تەڤایا ناڤچەیێن كو بەریا نها كۆنترۆل كربوون بخێتە بن دەستێ خوەدە .

مەدیایێن ئەمریكا ئەشكەرەكرن كو رەشنڤیسێ دایەزانین كو رێخستنا تەرۆرستی یا داعشێ هەول ددە خلافەتێ ل چەند ناڤچەیەكێ ل سووریا رابگهینە , ودەما كو خلافەت وەرە راگەهاندن , رێخستنا تەرۆرستی یا داعشێ وێ چەند ناڤچەیەكێ ژ سووریێ كۆنترۆل بكە , ئەوژی ئەگەر رژێما ئەسەد نكاربە ناڤچەیان كۆنترۆل بكە ووان بپارێزە .

وەكە مەدیایێن ئەمریكی دبێژن , رەشنڤیسێ ناكۆكیێن ناڤبەرا بەرپرسیارێن ئەمریكا دە ئەشكەرە دكە , وب تایبەتی ناڤبەرا وان بەرپرسیاران دە كو نەرخاندنێ ژ بۆ رەوشا رێخستنا تەرۆرستی دكن , ودزانن كو هینا مەترسیا وێ رێخستنا تەرۆرستی هەیە .

وبەریا چەند رۆژان دان كۆتس رێڤەبەرێ ئەولەهیا نشتیمانی یا ئەمریكا ل پێشیا كۆنگرێسێ ئەمریكا راگەهاندبوو كو هینا داعش ب داوی نەهاتیە , ورێخستنا تەرۆرستی یا داعشێ ب هەزاران چەكدارێن وێ ل عێراقێ وسووریا هەنە , وهەروەها هینا داعش سەرپەرشتیا ئێریشێن رۆژهلاتا ناڤین ووەلاتێن رۆژئاڤایی ژی دكە.

ئەڤ راپۆرت د دەمەكێ دە تێ كو پاتریك شاناهان وەزیرێ بەرەڤانیا ئەمریكا یێ ب وەكالت گۆتبوو كو د دەمەكە نێزیك دە سەد ل سەد داعش وێ وەرە ژناڤبرن , وخاكا سووریێ وعێراقێ وێ ژ دەستێ وان وەرە دەرخستن .
ز.ح

674