كەنەدی: كورد نە هەڤپەیمانێ ئەمریكایە ل رۆژهلاتا ناڤین
آرك نيوز.. سیناتۆرەكی ئەمریكی دبێژە پێویستە ئەمریكا كوردان بخێتە ناڤا ئیستراتیجیەتا خوەدە ل رۆژهلاتا ناڤین , وئەو ستراتیجیەتا ئەمریكی كو ژ بۆ رۆژهلاتا ناڤین هاتی دارێژتن نە جهێ گرینگیێ یە .
جۆن كەنەدی ئەندامێ ئەنجوومەنێ پیرێن ئەمریكا د گۆتووبێژیەكێ دە ل ئەنجوومەنێ پیرێن ئەمریكا دە راگەهاند كو پرۆژەیەك بۆ پاراستنا هەڤپەیمانێن ئەمریكا ل رۆژهلاتا ناڤین ژ ئالیێ ( رۆبیۆ ئێس وان ) ڤە هاتیە دارێژتن , لێ ئەو پرۆژە تو گرینگیا وێ نینە , ژ بەر كوردان ل خوە ناگرە .
جۆن كەنەدی ئاماژە ب بوویەرێن دیرۆكی كر وراگەهاند كو دەما دەولەتا عوسمانی روخا , ئەمریكا پشت ل كوردان كر ,و دەولەتەك ژ بۆ كوردان دانەمەزراند , ئەوژی د دەمەكی دە كو كێمترین نەتەوێن رۆژهلاتا ناڤین بوونە خوەندان دەولەت.
هەروەها وی سیناتۆرێ ئەمریكی گۆت : پێویستە ئەمریكا سیاسەتا پشت بەردانا كوردان بگوهارە , ژ بەر د شەرێ دژی رێخستنا تەرۆرستی یا داعشێ دە ل سووریا وعێراقێ ب تەنێ كورد رۆلا وان یا گرینگ هەبوو , ویەك لەشكەرێ ئەمریكی ل ناڤچەیێن دبن دەستێ كوردان دە ل هەرێما كوردستانێ نەهاتە كوشتن .
كەنەدی ئاماژە ب نەهامەتی وكارەساتێن كوردان یێن دیرۆكی ل سەر دەستێ دوژمنێن كوردان كر وگۆت پێویستە ئەمریكا پرۆژەیەكێ ژ بۆ پاراستنا كوردان ل رۆژهلاتا ناڤین دابرێژە .
ل گۆری وێ پرۆژەیا كو ژ بۆ پاراستنا هەڤپەیمانێن ئەمریكا ل رۆژهلاتا ناڤین هاتی ئامادەكرن , ئەو پرۆژە كوردان ل خوە ناگرە , لەوما جۆن كەنەدی داخواز ژ ئەمریكا ژی كر كو كوردان بخێتە بازنەیا هەڤپەیمانێن خوەدە , وسەرۆكێ ئەمریكا د دەمێ پێویست دە لڤ وتەڤگەرێ ب هێز بكە ژ بۆ پاراستنا كوردان .
هەروەها جۆن كەنەدی گۆت ئەگەر ئەمریكا پشتا كوردان ل سووریا بەردە , ووەلاتێن كو دخوازن ناڤچەیێن كوردی بخنە بن دەستێ خوەدە ئێریشی كوردان بكن , وی دەمی كورد وێ راستی كارەساتان ببن .
د داوی دە جۆن كەنەدی گۆت كو نابە ئەمریكا جاوازیێ بخێتە ناڤبەرا هەڤپەیمانێن خوەدە , وب تەنێ هنەك هەڤپەیمانێن خوە بپارێزە , وپشتا هنەكە دن بەردە , وئەركە ل سەر ئەمریكا پەیمان وسۆزێن خوە جه بجه بكە .
ز.ح
649
