پنتاغۆن: تو دەمەكە دیاركری ژ بۆ ڤەكشانا هێزێن ئەمریكی ژ سووریێ نینە

آرك نيوز...وەزارەتا بەرەڤانیا ئەمریكا ئەشكەرەكر كو د چارچۆڤەیا دەستپێكرنا پرۆسەیا ڤەكشانا هێزێن ئەمریكی ژ سووریێ , ژمارەیا هێزێن ئەمریكی ل سووریێ وێ نەخویا بە , وئەگەر هەیە ئەو ژمارە كێم وزێدە ببە .

شۆن رۆبێرتسۆن جێگرێ نڤیسگەها راگەهاندنا وەزارتا بەرەڤانیا ئەمریكا ژ ئاژانسا نوفۆستی یا رۆسی رە راگەهاند كو ئەمریكا دەربارێ دەمێ دەستپێكرن وب داوی هاتنا پرۆسەیا ڤەكشانا هێزێن ئەمریكی ژ سووریێ تو زانیاریان ئەشكەرە ناكە , وئەگەر هەیە ژمارەیا هێزێن ئەمریكی ل سووریێ كێم وزێدە ببە.

هەروەها جێگرێ نڤیسگەها راگەهاندنا وەزارتا بەرەڤانیا ئەمریكا گۆت كو پرۆسەیا ڤەكشانا هێزێن ئەمریكی ژ سووریێ ب پرۆسە وپێشهاتەیێن ل سەر عەردێ ڤە , وهەروەها ب گۆتووبێژیێن ل گەل هەڤپەیمانێن ئەمریكا ڤە گرێداییە , لەوما دەمەكە دەستنیشانكری ژ بۆ ڤەكشانا هێزێن ئەمریكی ژ سووریێ نینە.

شۆن رۆبێرسۆن گۆت كو هەڤپەیمانیا ناڤدەولەتی ل دژی داعشێ ب سەرپەرشتیا ئەمریكا , ب هشیاری هەولا جه بجهكرنا پرۆسەیا ڤەكشانا هێزێن ئەمریكی ژ سووریێ ددن , ئەوژ ی داكو رووبرووبوونا دژی داعشێ راستی تو كریز وكێشەیان نەبە .

بەریا نهاژی كەمالا سی ئێن ئێن یا ئەمریكی ل سەر زارێ دو ژێدەرێن لەشكەری بەلاڤكر كو ئەمریكا هێزنە نوو شاندنە سووریێ , ئەوژ ب مەبەستا دابینكرنا ئەولەهیا بەژایی وئاسمانی ژ بۆ پرۆسەیا ڤەكشانا هێزێن ئەمریكی ژ سووریێ .

بریارا ڤەكشانا هێزێن ئەمریكی ژ سووریێ ژ نیشكێڤە هاتە دان , ونەچاڤەرێكری بوو ل جەم گەلەك وەلاتێن هەرێمی وجیهانی , هەروەها بریارا ڤەكشانا هێزێن ئەمریكی ژ سووریێ ماتمایی ل جەم خودێ بەرپرسیارێن ئەمریكی ویێن ئیدارەیا ترامپ دروستكر , ووەكە نەرازیبوونەكێ ل سەر بریارێ جێمیس ماتیس وەزیرێ بەرەڤانیا ئەمریكا , وبرێت مەكگۆرك شاندەیێ سەرۆكێ ئەمریكا ژ بۆ شەرێ داعشێ دەست ژ كار كشاندن .
ز.ح

486