سێ تهقین ههرێما عهفرینێ ههژاند
د چارچۆڤهیا سێ رۆژان ده سێ تهقینێن ب هێز ههرێما عهفرینا رۆژئاڤایێ كوردستانێ ههژاند و زیانێن هاتنه تۆماركرن ب تهنێ مادیبوون .
دوه 18/1/2019 ل ناڤهندا باژارێ عهفرینێ ل سهر رێیا راجۆ ل تاخا مهحموودیێ ل قۆنجكا دبستانا پێشهسازیێ دهردۆرا دهمژمێر نهه و 25 خولهكان ده پۆمبهیهك بۆمبرێژكری ل جههكێ چۆپ و پاشمهیان ده تهقییا .
ل گۆر ژێدهرهكه تایبهت ژ ناڤ باژارێ عهفرینێ ژ ئاركێ ره راگهاندیه كو تهقینا دوه رهوشهك ژ ترسێ ل جهم خهلكێ سڤیل چێكر ژ بهر كو دهنگێ وێ تهقینێ گهلهك بهێز و بلندبوو ب تایبهت ئهو تهقین دهما شهڤێ ده بوو كو ب شهڤ عهفرین دبه وهك باژارهكه ڤالا ژبهر كو خهلك ب سهدهما رهوشا ئهولههیێ ونهئارامیێ نكارن چوون وهاتنێ بكن لهوما ئارامییهك ب ترس چێدبه .
ژێدهرێ ههروهها ئامهژه ب وێ یهكێ كر كو گرووپێن چهكدار ب خوه ب ڤان كاران رادبن داكۆ بهانهیا مانا خوه د عهفرینێ ده بهێز بكن و بچهسپێنن وببێژن عهفرین راستی تهقینان تێ لهوما ههبوونا وان گرووپان پێویسته ب تایبهت كو نها حكومهتا توركیێ كار ژ بۆ دانینا پۆلیسێن سڤیل ل شوونا وان گرووپێن كو ب بنپێكرنان رادبن دكه .
بهریا وێ تهقینێ ژی ل ناڤهندا ناڤچهیا جندرێسێ تهقینهك رۆژا پێنشهمێ 17/1/2019 روودابوو وزیانێن جادی نههاتنه تۆماركرن و ب تهنێ ئۆتۆمبێلا تیما كوم سپی كو ب بهرهڤانییا سڤیل تێنه ناسكرن هاته شهوتاندن .
د رۆژا چارشهمێ ژی 16/1/2019 تهقینهك ل ههمان تاخا مهحموودیێ یا ناڤهندا باژارێ عهفرینێ چێبوو وزیانێن وێ تهقینێ ژی دیسا مادی بوون و زیان نهگهشت وهلاتییان .
ب وێ یهكێ ههرێما عهفرینێ د ههیاما سێ رۆژان ده سێ تهقینان تۆمار دكه كو ب وان كریاران كهسێن ل پاش دخوازن ئارمانج ومهرمێن خوه ببن سهری و رهوشهك تهڤلیههڤیێ ونهئارامیێ ژ رهوشا نها بێتر دروست بكن وبئاڤرینن .
ش.ع
495
