رێڤەبەریا نوو یا رۆژهلاتێ چەمێ فەراتێ ..شرۆڤە ونەرین

آرك نيوز...دەربارێ رێڤەبەریا نوو یا رۆژهلاتێ چەمێ فەراتێ چەندین شرۆڤە ژ توویتا دۆنالد ترامپ سەرۆكێ ئەمریكا رە هاتنە كرن دەما كو گۆت وێ ناڤچەیەكە ئارام ب كووربوون ئانگۆ بەرفەرەهیا سی ودو كیلۆمتران وێ ئاڤا بكە .

د چارچۆڤەیا بەشداریێ د بەرناما جڤات دە فەصلە یووسف ئەنداما دەستەیا سەرۆكاتیا ئەنجوومەنا نشتیمانی یا كورد ل سووریێ راگەهاند كو راستە ئەمریكا بریارە ڤەكشانا هێزێن خوە ژ سووریێ دایە , لێ ژ رووێ سیاسی ڤە ئەمریكا وێ ل دەڤەرێ بمینە , وئەو ناڤچەیا ئارام كو دبن سەرپەرشتیا جڤاكا ناڤدەولەتی دە وەرە ئاڤاكرن وێ خزمەتا دۆزا گەلێ كورد بكە .

وژئالیێ خوەڤە سیامەند حاجۆ سەرۆكێ شەپێلا پێشەرۆژا كورد ل سووریێ راگەهاند كو نابە پشت ب توویتێن دۆنالد ترامپ وەرە گرێدان , ژ بەر ئەوێ ل سەر عەردێ تێ كرن بەروڤاژیێ تویتێن ترامپ ە , وتوركیا ژ سالا دو هەزار وچاردەهان ڤە داخوازا ئاڤاكرنا ناڤچەیەكە ئارام ل رۆژهلاتێ چەمێ فەراتێ كریە .

هەروەها جەدعان عەلی ئەندامێ نوونەراتیا هەرێما كوردستانێ یا ئەنجوومەنا نشتیمانی یا كورد لسووریێ راگەهاند كو رێڤەبەریا پەیەدە ل سەر هەموو ئاستان سەرنەكەتیە , وژ بۆ بەرژەوەندیا گشتی یا ناڤچەیێ ئەمریكا وێ رێڤەبەریەكە نوو ئاڤا بكە , ورێڤەبەریا پەیەدە وێ وەرە هلوەشاندن , وئەو رێڤەبەریا نوو یا كو وێ وەرە ئاڤاكرن پێویستە ب رازیبوونا تەڤایا ئالیێن ناڤدەولەتی بە , وتەڤایا پێكهاتەیان ل خوە بگرە .

دكتۆر محمد رشید ئەكادیمیناس ومامۆستا ل زانینگەها صەلاح الدین راگەهاند كو تو رۆلا ئەمریكا ل ناڤچەیێ نەمایە , وب تەنێ ئەركێ وێ ژ ناڤبرنا داعشێ بوو , ووەكە ددە خویاكرن كو ئەركێ خوە ب داوی ئانیە , وئیستراتیجیەتا كوردی ب توویتێن ترامپ ڤە گرێدایی یە .

ژ دەما كو ئەمریكا بریارا ڤەكشانا هێزێن خوە ژ رۆژهلاتێ چەمێ فەراتێ دایە , ورۆژانە سیناریۆێن نوو ژ بۆ رۆژهلاتێ چەمێ فەراتێ رە تێنە پێشبینیكرن , وهەر وەلاتەك دخوازە هەژموون ورۆلا خوە ل وێ ناڤچەیێ بهتر بكە , ئەوژی پشتی ڤەكشانا هێزێن ئەمریكی .
ز.ح

402