نتنیاهۆ : ئەمێ ئێریشێن خوە ل سوریێ گوورتر بكن

نتنیاهۆ : ئەمێ ئێریشێن خوە ل سوریێ گوورتر بكن

Jan 14 2019

ارك نیوز .. سەرۆك وەزیرێن ئسرائیلێ بنیامین نتنیاهۆ سۆزا گووركرنا ئێریشێن خوە ل سوریێ دا ئەگەر پێویست بوو .

بنیامین نتنیاهۆ د گەرەكە خوە دە ژبۆ ناڤا لەشكەرێن ئسرائیلی یین كو تۆنەلێن حزب الله یا لبنانی تێك ددن راگهاند كو د هەیاما چل و هەیشت دەمژمێرێن بووری دە ئارتێشا ئسرائیلێ عەمبارەكە چەكان یا ئیرانێ ل بالافرخانەیا شامێ یا ناڤدەولتی ئارمانج كر، و گۆت كو ئەڤ یەك ددە خویاكرن كو ئسرائیل د سیاسەتا خوە دە لدژی هەبوونا ئیرانێ د سوریێ دە بەردەوامە، وتەكەز كر كو ئسرائیل رژدە لسەر رێگریێ ل بهێزبوونا هەژموونا ئیرانێ لسوریێ .

هەروەها سەرۆك وەزیرێن ئسرائیلێ تەكەز ژی كر كو ئەگەر پێویست بوو ئەوێ ئۆپەراسیۆنێن خوە یێن ئەسمانی ل ناڤا خاكا سوریێ بێهتر بكن .

هەڤدەمی داخویانیێن نتنیاهۆ ئارتێشا ئسرائیلێ تۆنەلەكە شەشان یا ئیرانی كو ژ خاكا لبنانێ دەسپێدكە و لناڤا خاكا ئسرائیلێ بداوی دبە دیت .. كو ئەڤ تۆنەل مەزنترین تۆنەلە ژ ئالیێ ئارتێشا ئسرائیلێ ڤە تێ ئەشكەرە كرن .

سەرۆك وەزیرێن ئسرائیلی بەردەوامی ب گۆتنا خوە كر و گۆت كو دەما ئارتێشا ئسرائیلێ مەزنترین ئۆنەلەكە ئیرانی ئەشكەرە دكە ، ئەڤ یەك وێ واتەیێ ددە كو پرۆسەیا مەرتالا باكور سەركەفتی یە و وێ دەرئەنجامێن مەزن ب دەست خوەڤە بینە .

هەر دڤێ دەربارێ دە بنیامین نتنیاهۆ سەرۆك وەزیرێن ئسرائیلێ دیار كر كو ئسرائیل وێ د چاڤدێریا هەموو چالاكیێن كو ژ ئالیێ حزب الله لبنانی و ئیران و رێخستنێن بسەرڤە ل سوریێ تێنە ئەنجام دان بەردەوامبن ، و گۆت ئەوێ پێویستبە ژبۆ گەرەنتیا ئەولەهیا ئسرائیلێ وێ وەرە كرن .

پشتی ئەنجامدانا ئسرائیل ژ عەمبارەكە چەكان یا ئیرانی ل بالافرخانەیا شامێ د بەربانگا رۆژا شەمیێ دە ، نتنیاهۆ دان پێدان ب ئەنجامدانا ئارتێشا ئسرائیلێ ب سەدێن ئێریشان ل ناڤا خاكا سوریێ كر .

ئەڤ داخویانیێن سەرۆك وەزیرێن ئسرائیلێ هاتن پشتی راگهاندنا سەرۆكێ دەستەیا ئارتێشا ئسرائیلێ یێ بەرێ گادی ئیزنكۆت كو د سالا دوو هەزار و هیژدەهان دە ، بالافرێن شەركەر یێن ئسرائیلی ب دوو هەزار تۆپ بنگەهێن ئیرانی ویێن حزب الله یا لبنانی كرنە ئارمانج .

ل . ع

444