پنتاغۆن: هێزێن ئەمریكی ژ سووریێ ڤەنەكشیانە

آرك نيوز..پشتی كو هەڤپەیمانیا ناڤدەولەتی یا ل دژی داعشێ دەست ب ڤەكشانا هنەك ئالاڤێن لەشكەری ژ سووریێ كر , ودەنگۆیا ڤەكشانا هێزێن ئەمریكی ژی هاتە هۆلێ , پنتاغۆنا ئەمریكی ئەو نووچە رەتكر وگۆت كو هێزێن ئەمریكی ژ سووریێ ڤەنەكشیانە .

وەزارەتا بەرەڤانیا ئەمریكا " پنتاغۆن " راگەهاند كو تو هێزەكە ئەمریكی ژ رۆژئاڤایێ كوردستانێ وسووریێ ڤەنەكشیایە , وهێزێن ئەمریكی ژ جهێن خوە تەڤگەر نەكرنە .

ژێدەرەێن نووچەیان ل سەر زارێ بەرپرسیارەكی وەزارەتا بەرەڤانیا ئەمریكا بەلاڤكرن كو ئەمریكا ب كردار دەست ب ڤەكشانا هێزێن خوە ژ سووریێ كریە , وئیرۆ پنتاغۆنا ئەمریكا ئەو نووچە رەتكر وتەكەزی ل سەر ڤەنەكشانا هێزێن خوە ژ سووریێ كر .

دو بەرپرسیارێن وەزارەتا بەرەڤانیا ئەمریكا راگەهاندن كو ب تەنێ ئەمریكا چەند ئالاڤەكە لەشكەری ژ رۆژئاڤایێ كوردستانێ ڤەكشاندن , ول هەرێما كوردستانێ ب جه كرن , وتو هێزەكە ئەمریكا ژ رۆژئاڤایێ كوردستانێ ڤەنەكشیایە .

رۆژنامەیا شەرق الاوست ئەشكەرەكر كو وان دو بەرپرسیارێن وەزارەتا بەرەڤانیا ئەمریكا گۆتیە كو ئەگەر هەیە ئەمریكا هێزێن خوە ل سووریێ بهتر بكە , ئەوژی داكو چاڤدێریا پرۆسەیا ڤەكشانا هێزان د پێشەرۆژێ دە بكن .

شەڤا ( 19/ 12 / 2018 ) كۆشكا سەرۆكاتیا ئەمریكا ئانگۆ كۆشكا سپی راگەهاند كو ئیدارەیا دۆنالد ترامپ سەرۆكێ ئەمریكا بریارا ڤەگەرا هێزێن ئەمریكی ژ رۆژئاڤایێ كوردستانێ دایە .

ئەو هێزێن ئەمریكی یێن نها ل رۆژئاڤایێ كوردستانێ ورۆژهلاتێ سووریێ بجه بوونە , د چارچۆڤەیا هەڤپەیمانیا ناڤدەولەتی ل دژی داعشێ دە دەرباسی ناڤا خاكا سووریێ بوونە .

بریارا ڤەكشانا هێزێن ئەمریكی كارڤەدانێن جۆر ب جۆر ئانینە هۆلێ , وهەری داوی جان ئیف لۆدریان وەزیرێ دەرڤەیێ فەرەنسا راگەهاند كو بریارا ڤەكشانا هێزێن ئەمریكی ژ سووریێ بریارەكە مەترسیدارە .
ز.ح

517