بۆلتۆن: ئەمریكا ئامادەیا پرسا كوردی ل گەل رووسیا گۆتووبێژ بكە .

آرك نيوز...پشتی سەردانا ئیسرائیل وتوركیا , راوێژكارێ ئەولەهیا نەتەوی یا ئەمریكا دبێژە كو ئەمەریكا ئامادەیە ژ بۆ پرسا پاراستنا كوردان ل سووریێ , ود ڤێ دەربارێ ئەمریكا ئامادەیە كو گۆتووبێژیێ ل گەل رووسیا بكە .

جۆن بۆلتۆن راوێژكارێ ئەولەهیا نەتەوی یا ئەمریكا د گفتووگۆیەكێ دە ل گەل رۆژنامەڤانەكی ئەمریكی ب ناڤێ هیو هیویت كو یاوەریا شاندا سەردانا بۆلتۆن بۆ ئیسرائیل وتوركیا دكر گۆتیە كو دۆنالد ترامپ سەرۆكێ ئەمریكا د پەیوەندیا تەلەفوونێ دە كو د 23/ مەها بەرچلەیا سالا دو هەزار وهژدەهان ل گەل رەجەب تەیب ئەردۆغان سەرۆكێ توركیا داخوازا گەرەنتیا پاراستنا كوردان كریە .

هەروەها وی رۆژنەمەڤانێ ب ناڤێ هیو هیویت ل سەر زارێ بۆلتۆن گۆت كو ترامپ گۆتیە نابە توركیا هەڤپەیمانێن ئەمریكا ل شەرێ دژی داعشێ ئارمانج بكە .

هەورەها هیویت ئەشكەرەكر كو جۆن بۆلتۆن راوێژكارێ ئەولەهیا نەتەوی یا ئەمریكا گۆتیە هزركرنا وی ویا مایك پۆمپیۆ وەزیرێ دەرڤەیێ ئەمریكا راست دەركەت كو رەجەب تەیب ئەردوغان پابەندی ب گۆتنا خوە نەكریە.

جۆن بۆلتۆن هێڤی كر كو حەفتیا بێ بەرهەمێ وان گۆتووبێژیان كو ل گەل بەرپرسیارێن ئیسرائیل وتوركیا ئەنجام دایی دەركەڤن , ودەرئەنجامێن ئەرێنی ژ وان گۆتووبێژیان هەبن .

د داوی دە راوێژكارێ ئەولەهیا نەتەوی یا ئەمریكا گۆت كو ل گەل بەرپرسیارێن توركیا ئامادەییا ئەمریكا نیشاندایە , كو ئەمریكا دەربارێ پرسا كوردی ئامادەیە گۆتووبێژیێ ل گەل رووسیا ژی بكە ئەگەر پێویستی پێ هەبە .

حەفتیا بووری جۆن بۆلتۆن سەردانا ئیسرائیل وتوركیا كر , ول گەل بەرپرسیارێن هەردو وەلاتان چارەسەركرنا كریزا سووریێ بگشتی ویا رۆژئاڤایێ كوردستانێ گۆتووبێژكر , ول توركیا ئەردوغان رازی نەبوو پێشوازیێ ل بۆلتۆن بكە , لەوما بۆلتۆن ب عاجزی ژ توركیێ دەكەت .
ز.ح

578