پەیامنێرێن بێ سینۆر داخوازا ئەشكەرەكرنا چارەنڤیسا رۆژنامەڤان ئەمیر حامد دكە

رێخستنا پەیامنێرێن بێ سینۆر داخوازا ئەشكەرەكرنا چارەنڤیسا رۆژنامەڤان ئەمیر حامد كر كوئەڤە پێنچ سالن نووچەیێن وی هاتنە برین.

رۆژا 11ێ چلەیا 2011ان، ئەمیر حامد ل گەل چار هەڤالێن خوە ل مالا خوە ل دربێسیێ ژ ئالیێ چەكدارنە پەیەدێ ڤە هاتن رەڤاندن، سێ ژ هەڤالێن وی سەربەست هاتن بەردان، لێ هین چارەنڤیسا ئەمیر حامد نەدیارە.

پەیامنێرێن بێ سینۆر ل سەر مالپەرا خوە یا فەرمی ئەشكەركر كو وان پەیوەندی ب چەكدارێن یەپەگێ دەربارێ ئەمیر حامد رە كریە، و بەردەڤكەكی یەپەگێ گۆتیە هن دەم ژبۆ دۆزا ئەمیر حامد پێویستە.

د ڤێ دەربارێ دە، سۆفی ئەنمۆت، رێڤەبرا ئۆفیسا رۆژهلاتا ناڤین یا پەیامنێرێن بێ سینۆر داخوازا ئەشكەرەكرنا چارەنڤیسا ئەمیر حامد و هەموو رۆژنامەڤانێن كو هین وندای ن ل سووریێ كر، و گۆت كو هەموو ئالیێن ل سووریێ دمینن دبەر چارەنڤیسا گرتیان ل ژێر ناڤچەیێن دەستهلاتا خوە دە، بەرپرسن.

دەزگەها ناڤبۆری لسەر زارێ برایێ ئەمیر حامد یێ بناڤێ، مەسعوود حامد بەلاڤكریە كو برایێ وی پێشەڤانیا خوەنیشاندانێن لدژی بەشار ئەسەد ژ سالا دوهەزار و یازدەهان ڤە دكر، كو وێنە و زانیاری ددان ئالاڤێن راگهاندنێ، هەروەها رێڤەبرێ هەژمارەك تەڤگەرێن شۆرەشگێری لناڤچەیێن كوردستانا سووری بوو، د سالا 2011ان دە ژی رێژیمێ چەند رۆژان ئەمیر حامد ژبەر چالاكیێن وی گرتبوو.
د سالا 2018ان دە، وەلاتێ سووریێ د پلەیا 177ان ژ كۆما 180 وەلاتان دەبوو، د رێزبەندیا جیهانی یا ئازادیا رۆژنامەگەریێ.

406