عه‌فرین .. مالباتێن كورد گوندێ دێوا ب جه هشتن
شه‌ر وپه‌ڤچوون ناڤبه‌را چه‌كدارێن گرووپا الحمزات وعمشات یێ سه‌ر سولتان مراد كو ل عه‌فرینێ جهێ خوه گرتنه ل ئالیه‌كی و چه‌كدارێن ئه‌نییا نوسرا ل گوندێن عه‌فرینێ یێن هه‌ڤسینۆر ب باژارۆكێ ئاتمێ یێ سه‌ر ب پارێزگه‌ها ئدلبێ ڤه به‌رده‌وامه و ژ به‌ر شه‌ر وپه‌ڤچوونان وته‌ڤلیهه‌ڤییا ره‌وشێ خه‌لكێ گوندێن هه‌ڤسینۆر ده‌ست ژ مال وملكێن خوه به‌ردان وبه‌رێ خوه دان گوندێن دن .
ژێده‌ره‌كه تایبه‌ت ژ ناڤ گوندێ دێوا یێ سه‌ر ب ناڤچه‌یا جندرێسێ یا عه‌فرینێ ئیرۆ ژ ئاركێ ره راگهاند كو ژ چار رۆژان ڤه شه‌ر ناڤبه‌را گرووپێن چه‌كدار یێن ل عه‌فرینێ دمینن وب تایبه‌ت حمزات و عمشات ل ئالییه‌كی وئه‌نییا نوسرا كو ناڤ ل خوه گرنه چه‌كدارێن ده‌سته‌یا تحریر الشام ل گوندێ دێۆا و گوندێن ده‌ردۆرێ به‌رده‌وامه و د ئه‌نجاما وێ شه‌ری ده خه‌لكێ گوند ژ گوند ده‌ركه‌تن وبه‌رێ خوه جهه‌كی دن .
ژێده‌را كو نه‌خوه‌ستیه ناڤ وی وه‌ره ئه‌شكه‌ره‌كرن هه‌روه‌ها دا زانین كو چه‌كدارێن ئه‌نییا نوسرا ل ده‌ردۆرا گوند جهێ خوه گرتنه و ژ گوند ڤه نێزیك بوونه ل هه‌مبه‌ر ده چه‌كدارێن حمزات وعمشات ل ناڤ گوند ده شه‌ر دكن وتو كه‌سی سڤیل ل ناڤ گونده نه‌مایه و خه‌لكێ وی گوندی ئانگۆ گوندێ دێۆا ل ناڤه‌ندا باژارێ عه‌فرینێ و گوندێن دن هاتن بجهكرن .
گوندێ دێۆا یه‌ك ژ گوندێن ناڤچه‌یا جندریسێ یا عه‌فرینێ یه و داویترین گوند ناڤبه‌را سینۆرێ عه‌فرینێ و باژارۆكێ ئاتمه یێ ئدلبێ یه ونها شه‌ره‌كی گران تێده روودده وخه‌لكێ وێ جاره‌كه دن ده‌ربده‌ر بوون وژ به‌ر شه‌ر مال وملكێن خوه بجه هشتن .
ش.ع
369
