سیاسەتمەدارێن كورد: هەر ڕێكەفتنەكە نوو ب پەیەدێ رە دڤێ بنگەها وێ رێكەفتنێن هەولێر و دهۆكێ بە
سیاسەتمەدارێن كورد بەرسڤا ڤەخوەندنا پەیەدێ یا ب ناڤێ كۆنگرا نشتیمانی كوردستانی كەنەكێ ددن، ودبێژن پەیەدێ نە ب باوەریێن خوە ئەڤ ڤەخوەندن بلاڤكرییە و دخوازە جادەیا كوردی ومللەتێ كورد بخاپینە، لێ بەلێ پەیەدێ كارنامەێن ئالینە ژدەرڤە بجه دكە و هەر رێكەفتنەك نوو ب پەیەدێ رە ودناڤبەرا ئەنجومانا نشتیمانییا كوردی ل سووریێ وپەیەدێ دڤێ بنگەها وێ رێكەفتنێن هولێر ودهۆكێ بە كو ل ژێر چاڤدێرییا سەرۆك بارزانی و ل هەرێما كوردستانێ هاتبوون ئمزا كرن.
دەربارێ ڤێ ڤەخوەندنا كەنەكێ دە ئەندامێ كۆمیتا ناڤەندی یا پارتیا دەمۆقراتا كوردستان – سوریا، علی مسلم ژ ئاركێ رە راگهاند كو چ رێكەفتن ژبۆ یەكرێزییا ناڤمالا كوردی دگەل پەیەدێ ودەزگەهێن وێ وەرە كرن، دڤێ ل سەر بنگەهنە نەتەوەی نشتیمانی بهێزە بە.
سەركردەیێ پارتیێ، دا زانین، كو دڤێ ئەنجومانا نشتیمانیا كوردی ل سووریێ(ئەنەكەسێ)ل سەر ڤان بنگەهان دگەل رێخستنا ب ناڤێ كەنەكێ ل هەڤ بكە، ئەو ژی ، ڤەگەرا پێشمەرگەیێن رۆژ بێ شەرت ومەرج و بلاڤبوونا وان ل هەموو ناڤچەیێن كوردستانا سووریێ.
وهەروها دارشتنا پرۆژەیەكێ سیاسی تەمام كو مافێن سیاسی یێ مللەتێ كورد ل سووریێ ب ووردی دیار و ئاوایێ تێكلیێ ب پێكهاتەێن دن یێ مللەتێ سووریێ رە بكە.
علی مسلم، گۆت، دڤێ ئالییەكە ناڤدەولەتی نەتەویێن یەكگرتی مینا گارەنتییەكە ژبۆ ڤێ رێكەفتنێ هەبە، وهەورها پەیەدێ ب تەمامی تێكلیێن خوە ب رێژیما سووریێ رە ببرە و داخوازا لێبۆرینێ ژ مللەتێ كورد بكە، پشتی وان هەموو كریاروبنپێكرنان كو دەرهەقێ مللەتێ كوردە كرییە.
سەركردەیێ پارتیا دەمۆقراتا كوردستان – سوریا، علی مسلم، گۆت دڤێ ئستراتیجیەتەك ژبۆنا ڤەگەرا پەنابەران وەرە دانین ودەستهلات و دابەشكرنا سەروەت وسامانێن وەلات ب ئاوایەكە وەكهەڤی بە.
رێخستنا ب ناڤێ كۆنگرا نشتیمانی كوردستانی، كەنەكێ یا سەر ب پەیەدێ ڤە بەری چەند رۆژان ڤەخوەندنەك بلاڤ كری بوو و داخواز ژ ئالیێن كوردی ل كوردستانا سووریێ كربوو داكو ب هەڤرە یەكرێزیا ناڤمالا كوردی بپارێزە و ل پێش گەفێن توركێ و هەر مەترسیەكێ راوەستە.
ژ ئالیێ خوە ڤە ژی، ئەندامێ دەستەیا سیاسی یا هەڤپەیمانیا نشتیمانی یا هێزێن شۆرەشێ وئۆپۆزسیۆنا سووریێ، وئەندامێ كۆمیتا سیاسی یا پارتییا یەكیتییا كوردستانی – سووریا ، عبدالله گدو، وەها بەرسڤا كەنەكێ دا، دڤێ پارتییا پەیەدێ یا كو ب ناڤێ كۆنكرا نشتیمانی كوردستانی دئاخڤە، وبانگا لهەڤنیزیك بوونێ ژ ئالیێن سیاسی كوردی دكە، ببە خوەدیێ نەرینەكە سیاسی كوردی سووری، و ب ئاوایەكە سڤیلی ئاشتی رێزگرتنێ ل همبەر هەڤركێ خوە بگرە، كو دوور بە ژ كریارێن تووند ل همبەر هێزێن ئۆپۆزسیۆنا نشتیمانی كوردی ئاشتیخواز ، وڤی یەكێ مینا هلبژارەدەكەیە مایندە بكار بینە، نەك دەما بكەڤە تەنگاڤیێ دە، دا كو ئەم بكارن ب هەڤرە دەرباسی شریكاتییەكە راستەقینە ببن.
تشتا كو تەڤدەم وپەیەدێ پشنیار دكە، نە باوەریەكە خودی یە، ونە ژی رازیبوونەكە پێشكێشی مللەتێ كورد ژ جادەیا كوردی دكە، لێ بەلێ، ئەڤ یەك ل ئەنجامێ داخوازاێن ئالیین ژ دەرڤەنە.
سیاسەتمەدارێ كورد، عبدالرحمن گەلو، دەربارێ یەكرێزییا ناڤمالا كوردی و هەلوێستا پەكەكێ نڤیسییە، كێشەیا پەكەكێ نە ب ئەنەكەسێ رە یە لێ بەلێ ب دۆزا كوردی ومللەتێ كورد رە یە، وڤەخوەندنا وێ ژبۆ لهەڤهاتنێ تەنێ ل سەر داخوازا رێژیمێ یە داكو مە ڤەگەرینە چارگۆشەیا یەكێ یا ب ناڤێ همبێزا وەلات ژبەر كو ب كورتی وكورمانجی ئەو نە چ ئالییەكە د چ پرۆسەیەكە سیاسی د پێشەرۆژێ دە، ژبەر ئەو تەنێ ئالاڤەكە ژبۆ بجهكرنا پیلانێن دژومنێن كوردان ودڤی ئەم هزر بكن دەربارێ كریارین پەیەدی دەربارێ مللەتێ كورد دە و دڤێ بەری هەر تشتەكی لێبۆرینێ ژ مللەتی كورد بخوازە و دڤێ رەنگ وئالاڤێن وان تاوانان ئەشكەرە بكە كو دەرهەقێ مللەتی كورد دە كرنە، كلیلا هە لهەڤهاتنەكێ دەركەتنا میلیسیایێن وێ ژ ژیانا سیاسی و ئەولەهییا مللەتێ كوردە نەك د بلاڤ كرنا ڤەخوەندنا دە یە كو ئارمانج ژێ گوهەرتنا شێوە و هەبوونا وێ د قۆناغا ب داوی هاتنا وێ دە یە.
دەربارێ ڤێ ڤەخوەندا پەیەدێ دە نەرینێن جودا جودا هاتنە دایین ژئالیێ رۆژشنبیر و نڤیسكار ورۆژنامەڤانێن كورد ڤە، دناڤبەرا ملگر و ئالیگرێ ڤێ ڤەخوەندێ ودژبەرێ وێ، گەلەكان مینا داڤەكێ ژ ئالیێ پەیەدێ و هەڤالبەندێن وێ ژبۆ ئەنەكەسی ڤەگرتییە و هنەك دن ژی دبینن كاڤەكی باشە لێ كو لێڤەگەرا وێ رێكەفتنێن هەولێرێ ودهۆكێ و ل ژێ چاڤدێرییا سەرۆك مسعود بارزانی دە بە.
ر.ع
664
