رێژیمێ كۆمبوونەك ژبۆ هۆز و ئێلان ل حەسەكێ برێكخست
رێژیمێ كۆمبوونەك ژبۆ هۆز و ئێلان ل ناڤا باژارێ حەسەكێ یێ رۆژئاڤایێ كوردستانی لدژی هەر هەبوونەكە بیانی ل سووریێ لدارخست.
دوه پێنشەمێ، رێژیمێ كۆمبوونەك ژبۆ سەرۆك هۆز و ئێلێن ئالیگرێن خوە لناڤا باژارێ حەسەكێ یێ رۆژئاڤایێ كوردستانێ لدارخست، تێ دە بانگا ڤەگەرا رێژیمێ بۆ هەموو ناڤچەیێن پارێزگەها حەسەكێ و سووریێ هات كرن، هەروەها سەرۆكێن وان هۆز و ئێلان پشتەڤانیا خوە ژ ئارتێشا رێژیمێ و سەرۆكێ رێژیمێ بەشار ئەسەد رە ئانین زمان، و هەر هەبوونەكە بیانی ل سووریێ شەرمەزاركرن و نەرازیبوونا خوە ژ گەفێن توركیێ بۆ دەرباسبوونا سووریێ نیشان دان.
رۆژا دوشەمبا بۆری ژی، رێژیمێ چالاكیەكە بەرفرەه ژبۆ ماموستە و رەوەشنبریێن خوە ل باژارێ قامشلۆ لدارخست، كو تێ دە بەشداربوویان داخویانیەك بەلاڤكرن ، پشتەڤانیا خوە ژبۆ ئارتێشا رێژیمێ و بانگا ڤەگەرا رێژیمێ بۆ هەمی ناڤچەیێن پارێزگەها حەسەكێ كر.
ئەڤ د دەمەكێ دە تێ كو چەكدارێن ی پ گ یێن بسەر پەیەدێ ڤە بانگەكە فەرمی ل رێژیمێ كرنە كو ڤەگەرن باژارێ منبج و گوندەوارێ وێ ب بەهانەیا رێگری لبەر دەرباسبوون و گەفێن توركیێ.
وزارەتا بەرەڤانیێ یا رێژیما ئەسەد ل سەر مالپەرا خوە یا فەرمی بەلاڤكربوو كو وەكە بجیكرن ژ رێكەفتنا ناڤبەرا وێ و چەكدارێن ی پ گ ێ یێن بسەر پ ی د ێ ڤە، ژبۆ ڤەگەراندنا ژیانا نۆرمال ل ناڤچەیێن سووریێ، كو ئەو رێكەفتن ژ یەكێ چلەیا دوهەزار و نۆزدەهان ڤە دەست پێ دكە، كاروانەكە چەكدارێن ی پ گ ێ ژ باژارێ منبجێ بەرەڤ رۆژهلاتێ چەمێ فراتێ ڤە ڤەكشانە.
536
