دۆسەیا گرتیێن كورد ل سووریێ بەر ب كورڤە دچە ؟
ژ دەستپێكا شۆرەشا سووریێ ڤە، هەتا كو خوەپێشاندان ل هەمۆ ناچەیێن كوردستانا سووریێ دەركەتن، هەڤتەریبی گوهەرتن وپێشهاتەیێن ل سەر مەیدانا سووریێ بگشتی و كوردی ب تایبەتی، تەنێ بەردەوامی بۆ دووبارەگرتنا خەبتكار و چاكلاڤان و ولاتیێن كوردێ سووریێ یە لتەڤاهیا جغرافیا سووریێ دە.
د شاما پایتەختا سووریێ دە، ژ دەستپیكا شۆرەشێ ڤە وهەتا ننها سەدان ژ ولاتیێن كورد یێن كو ل تاخاێن شامێ دمینن و ژ بۆ پارویێ نانێ خوە دخەبتە، تێن گرتن ورێژیم چارەنڤیسا وان ژی ئەشكەرە ناكە، وهەتا ڤێ گاڤی ژی چارەنڤیسا وان گرتیان نەزەلالە وبێ سەرۆشوێنن، سەرباری گرتیێن كور ژ بەری شۆرەشێ هاتنە گرتن.
ب هاتنا داعش ژ بۆ هنەك ناڤچەیێن كوردستانا سووریێ، ب سەدان ولاتیێن كورد ل رەقایێ وگوندەوارێ وێ وكۆبانێ وگرێ سپی و هنەك ناڤچەیێن باژاری حەسەكی ژی رەڤاندینە، تەڤی كو ئەو ناڤچەنە ژ داعش ژی رزگار بوون و بسەدان گرتیێن داعشێ ودیلێن وان ژ ئالیێ پەیەدێ وقسەدێ ڤە هاتن ئازادركرن ، لێ هەتا وەكە ئیرۆ چارەنڤیسا رەڤاندی وگرتیێن كورد ل وان ناڤچەیان نە دیارە وتەڤی كو گەلەك ئۆپەراسیۆنیێن پەڤگوهەرتنا دیلان وگرتیان دناڤبەرا قەسەدێ وداعشێ دە چێ بوو، لێ چانسێ گرتیێن كورد تێدە نەبوو، مینا پەڤگوهەرتنا كو ل گوندەوارێ دێرازۆرێ دناڤبەرا قەسەدێ ی اكو پرانیا وێ چەكدارێن پەیەدێ نە و وداعشی دە روودا وقەسەدێ دیلێن داعشێ ل همبەر رەڤاندیێن پارێزگەها سویدا یا سووریێ ئازادكرن، دیسان رەڤاندیێن كورد ژێ بێ چانس بوو.
د ناڤچەیێن كوردستانا سووریێ دە، پشتی رادەستكرنا وان ناڤچەیان ژ رێژێما سووریێ بۆ پەیەدێ، پەیەدێ ژی مینا رێژیما ئەسەد وداعشێ پشترە، دەست بگرتنا چالاكڤان وخەباتكار و رەڤاندنا وان كرییە وهەتا وەكە ئیرۆ هێژی چارەنڤیسا گەلەك ژ وان نە دیارە مینا ئەندامێ پۆلیتبیروویا پارتی دەمۆقراتی كوردستان- سووریێ بەهزاد دورسن و هەڤالی وی نچال عوسمان ل دێركێ و ادریس علو ومحمد سیدو واحمد سیود ل باژارێ عەفرینێ وهەروسا چالاكڤان امیر حامد ل دربێسێ وچالاكڤان فۆاد ابراهیم ل باژارێ دێركێ.
د ناڤچەیێن كو گرۆپێن چەكدار دەرباس بوویێ نە بێ پارە ژ ڤان كریاران، گرتنا سەدان ولاتیێن كورد ورەڤاندنا وان بهنجەتێن جودا جودا، مینا تێكلیا وان ب پەیەدێ رە ود راستی دە ژی پرانیا وان چ تێكلی ب پەیەدی رە نینە و دناڤا وان گەلە پیرو پیرە ژن ژی هەن ول همبەر سەربەست بەردانا وان برێن پەرێ خەیالی تێ خوستن.
هەڤتەریبی ڤان هەمۆ گرتن ورەڤاندن و كوشتنێ، پرۆسەیێن دانووستاندن وجڤاتێن ناڤدەولەتی ل جنێڤێ واستانا و جهێ دن بەردەوامە، هەری كێم دڤێ دۆسەیا گرتیێن كورد ل سەر مێزێ دانووستاندنا بە.
دناڤبەرا دەم ودەمەكێ دە، ئەم دبهیزن رێژیما سووریێ هژمارەك ژ گرتیان ئازاد دكە وەك ئەنجامەكی ژ دانووستاندنێن دبن سەرپەرشتیا دەولەتێن گەرنتیدار دە، لێ چانسێ گرتیێن كورد ل وان دە ژی پارە هەرێ كێمە.
ل همبەر ڤێ رەوشێ ، دڤێ هەمۆ ئالیێن رێخستنێن سڤیل و سیاسی ل كوردستانا سووریێ كار بكن دا كو دۆسەیا گرتیێن كورد بلگە بكە و لیستێن ب ناڤێن وان دروست بكە و بەرز بكە دادگە وئالیێن ناڤدەولەتی و دەرباسی دۆسەیێن دانووستاندنێن سووریی ژی بكن.
ر.ع
459
