گۆمێن چەكدار لعفرینێ د رەڤاندنا وەلاتیێن كورد دە بەردەوامن
ارك نیوز .. رۆژ ب رۆژو ئاستا بنپێكرنێن كۆمێن چەكدار ژ گرتن ، رەڤاندن ، تالانكرنا مالوملكان ، دزی، سەپاندنا باجان ، دەرحەقێ وەلاتیێن كورد دە لعفرینا رۆژئاڤایێ كوردستانی زێدەتر دبە .
رێخستنا مافێن مرۆڤان لعفرینێ راگهاند كو كۆمێن چەكدار ب كرێترین بنپێكرن و كریاران لعفرینێ رادبن و رۆژ برۆژ ئاستا بنپێكرنان دەرحەقێ وەلاتیێن كورد دە ل باژار و گوندێن بسەر عفرینێ ڤە زێدەتر دبە و وەلاتی راستی رەڤاندن و بنچاڤكرنێ تێین هەری داوی كۆمێن چەكدار ژمارەیەك سڤیل كو ژن ژی دناڤ واندە هەنە رەڤاندنە و بەرەڤجهێن نەدیارڤە برنە كو تا نها چارەنیڤیسا وان نەدیارە .
رێخستنی ئەشكەرە كر كو رۆژا دوێ ڤێ مەهێ لناڤەندا باژاری عفرینێ ، گروپا چەكدار یا بناڤێ پۆلیسا لەشكەری ، ژنا كورد رۆهات نووری یا بیست و دوو سالی ،خەلكا گوندێ گورزیلە، دەما كو ژ كارێ خوە ڤەدگەریا مالێ لسەر رێبەندا قۆس ل عفرینێ بتۆمەتا كو پەیوەندیا وێ ب رێڤەبەریا پەیەدێ یا بەرێ رە هەبوو هاتە رەڤاندن و تا نها چارەنیڤیسا وی نەدیارە.
د هەمان رۆژی دە وەلاتیێ كورد حسنی محمد شێخ محمد یێ تەمەن سیه سالی كو بخوە خەلكێ باژارۆكێ مێدانكێ یێ بسەر ناڤچەیا شیرانڤە یە ، ل ناڤەندا باژارێ ئعزازێ دەما كو ئالیكاریێن مرۆڤی لسەر خەلكێ بەلاڤ دكر ژ ئالیێ چەكدارێن پۆلیسا سڤیل هاتە رەڤاندن وتا نها چارەنڤیسا وی نەدیارە .
حسنی محمد شێخ خێزاندارە باڤێ دوو زارۆكایە بەریا نها چار جاران ژ ئالیێ كۆمێن چەكدار ڤە هاتبوو رەڤاندن جارا یەكێ د سالا دووهەزار و هیژدەهان دەبوو پشتی سالەكێ ژ زندانكرنێ ل همبەر فدیێ هاتە سەربەست بەردان ، دووەم جار د سالا دووهەزار و بیستێ دەبوو ژ ئالیێ چەكدارین پۆلیسا لەشكەری ڤە هاتبوو رەڤاندن و جارەكە دن ل همبەر پەرەیان هاتە ئازادكرن ، چارا سیێ ژ ئالیێ گروپا چەكدار یا بناڤێ پۆلیسا سڤیل ل ناڤچەیا معبتلێ هاتە رەڤاندن و چارا چارێ ژی ل سەر رێبەندەكە چەكدارێن پۆلیسا لەشكەری ل ناڤچەیا راجۆ هاتە بنچاڤكرن ، و داوین جار رۆژا پێشەما بووری بوو و تا نها چارەنیڤیسا وی نەدیارە .
رێخستنا ناڤهاتی سەربار كر كو ل رێكەفتا بیست وحەفتێ مژدارا بووری چەكدارێن پۆلیسا لەشكەری ژنا كورد یا بناڤێ نوال نعسان یا تەمەن بیست وپێنج سالی ژ گوندێ شێخ محمد یێ بسەر ناڤچەیا راچۆڤە رەڤاند و بەرەڤ جهەكی نەدیارڤە برن و تا رۆژا ئیرۆ جارەنیڤیسا وی نەدیارە .. نەوال نعسان بەریا نها ژ ئالیی كۆمین چەكدارڤە هاتبوو رەڤاندن و پشتی دوو دەمژمێران ژ ڤەكۆلینێ سەربەست هاتە بەردان .
رێخستنا مافێن مرۆڤان دیار كر ژی كو رۆژا سیێ بەرچلەیێ خبات مسلم بكر ژ خەلكێ گوندێ كوسانلی یێ بسەر ناڤچەیا راجۆ ڤە ژ ئالیێ چەكدارین پۆلیسا ئازاد هاتە رەڤاندن و تا رۆژا ئیرۆ تو زانیاریەك لسەر چارەنیڤیسا وی توونەیە .
رێخستنێ دا زانین كو پشتی كۆنترۆلكرنا توركیێ و گروپێن چەكدار ژ عفرینێ رە سالا دوو هەزار و هیژدەهان ، كۆمێن چەكدار وەلاتیێ كورد حمزە شعبان براهیم ژ دایكبویێ سالا هەزار و نەهسەد و نۆت و دووانە ل چاررێیا گوندێ حسندێرا یێ بسەر ناڤچەیا بلبلێ ڤە رەڤاند و ژ وێ دەمێ و تا رۆژا ئیرۆ چارەنیڤیسا وی نەدیارە هەروەها خوەشكا وی ژی یا بناڤێ اسیا شعبان ابراهیم ژ دایكبوویا دووهەزار و دووانە كو بخوە خەلكا خلیلاكایە رێكەفتا بیست وسیێ ئادارا دووهەزار و هیژدەهان هاتە رەڤاندن وهینژی چارەنیڤیسا وی نەدیارە .
لگۆری هەمان رێخستنێ راگهاندیە كو ژ سالا دوو هەزار و نۆزدەهان و تا رۆژا ئیرۆ چارەنیڤیسا دوو ژنێن كورد نەدیارە ئەوژی ڤیدان بلال ژ دایكبوویا سالا هەزار و نەهسەد و نۆت و نەهان خەلكا گوندێ قدە یێ بسەر ناڤچەیا راجۆڤەیە ، و وسال حنانە ژ دایكبوویا سالا هەزار و نەهسەد و هەیشتێ و شەشانە كو ئەڤە نێزی سێ سالن هاتنە رەڤاندن و چارەنیڤیسا وان نەدیارە .
207
