ئامارێن كۆرۆنا ل رۆژئاڤایێ كوردستانێ وسوریێ

ارك نیوز .. ژ دەما بەلاڤبوونا نەخوەشیا كۆرۆنایێ و تا رۆژا ئیرۆ ، رۆژ ب رۆژ و ئامارێن كۆرۆنایێ لسەرانسەری سوریێ بەرب زێدەبوونێ ڤە دچە چێ ل ناڤچەیێن كوردی لرۆژئاڤایێ كوردستانێ بە و چێ ژی ل دەڤەرێن دبن كۆنترۆلا رێژیم و ئۆپۆزسیۆنا سوریێ بە كو حەتا نها هەژمارا گشتی یا پێكەتیێن كۆرۆنایێ لسەرانسەری سوریێ گهشتیە نێزی پێنجی ونەه هەزار كەس ، و بێهتری دوو هەزار وشەسەد كەس ژی جانێ خوە ژ دەست دانە ..

دەربارێ داوین ئامار وپێشهاتەیێن كورۆنایێ ل رۆژئاڤایێ كوردستانێ رۆژ برۆژ و رەوشا كۆرۆنایێ خرابتر دبە و ڤیروسا كۆرۆنایێ ب ئاوایەكی بەرفرە ل تەڤایا ناڤچەیێن كوردی بەلاڤ دبە ، هەری داوی ژی تۆماركرنا 251 حالەتێن توشبوونێ یێن نوو ب كۆرۆنایێ ..

دەستەیا تەندروستیێ یا بسەر رێڤەبەریا پەیەدێ ڤە ئامارێن بیست وچار سەعێن بووری راگهاند كو ل رۆژئاڤایێ كوردستانێ 251 كەسێن دن بكۆرۆنا كەتنە ، 12 كەس جانێ خوە ژ دەست دانە و 25 كەس ژی بتەمامی ژ كۆرۆنا باش بوونە .

هەر لگۆری دەستەیا تەندروستیێ یا بسەر پەیەدێ ئەشكەرە كریە كو ب تۆماركرنا حالەتێن نوو یا توشبوونێ بكۆرۆنایێ هەژمارا گشتی ل رۆژئاڤایێ كوردستانی گهشتیە 15176 كەسان ژ وێ هەژمارێ 1538 كەس باش بوونە و 519 كەس ژی تا نها جانی خوە ژ دەست دانە .

ل ناڤچەیێن دبن دەستێ ریژیما ئەسەد دە ژی هەژمارا توشبوویان رۆژ برۆژ زێددەتر دبە كو هەژمارا توشبوویان تا نها گهشتیە نێزی بیست و دووهەزار كەسی

د داخویانیەكێ دە وەزارەتا تەندروستیێ یا ریژیما ئەسەد راگهاند كو د هەیاما بیست وچار دەمژمێرێن بوری دە 136 كەسێن دن ب كۆرۆنایێ كەتنە ، 16 كەسان چانێ خوە ژ دەست دانە ، 180 كەس ژی بتەمامی باشبوونە .

لگۆری داخویانیا وەزارەتا تەندروستیا ریژیمێ كو بڤێ ئاوایی هەژمارا گشتی یا پێكەتیێن كۆرۆنا ل دەڤەرێن ژێر كۆنترۆلا وێ دگهێژە 21,999 كەسان ، ژ وێ هەژمارێ 15,731 بتەمامی باش بوونە و 1,526 كەس ژی جانێ خوە ژ دەست دانە ..

و دەربارێ ئامارێن كۆرۆنایێ و داوین پێشهاتەیێن وێ ل دەڤەرێن ژێر كۆنترۆلا ئۆپۆزسیۆنا سوریێ ژی تۆرا هشیاریا پێش وەخت ،( پرۆگراما هشیاری و بەرسڤدانا نەخوەشیان ) د داخویانیەكە خوە دە راگهاند كو د هەیاما بیست وچار سەعیتێن بووری دە 18 كەسێن دن بكۆرۆنا كەتنە ، و 21 كەس ژی باش بوونە .

لگۆری داخویانیا پرۆگراما ناڤهاتی كو حەتا نها هەژمارا گشتی یا پێكەیان بڤیروسا كۆرۆنایێ ل دەڤەرێن دبن كۆنترۆلا ئۆپۆزسیۆنێ گهشتیە 21,798 كەسان ، ژ وێ ژمارەیێ 19,848 كەس باش بوونە و 641 كەسان ژی جانێ خوە ژ دەست دانە ..

299