ماكێنزی چارەنڤیسا هێزێن ئەمریكی ل كوردستانا سووریێ ئەشكەرە دكە

آرك نيوز...فەرماندەیێ فەرمانداریا ناڤەندا وەزارەتا بەرەڤانیا ئەمریكا دبێژە كو هێزێن ئەمریكی وێ بۆ دەمەكە درێژ ل سووریا وعێراقێ بمینن , ئەوژی داكو رووبرووێ هەژموونا ئێرانێ ببن.

جێنێرال كێنیس ماكنزی فەرماندەیێ فەرمانداریا ناڤەندا پنتاغۆك راگەهاند كو د چەند مەهێن بێدە ئەمریكا وێ ژمارەیا هێزێن خوە ل عێراقێ وسووریا كێم بكە , وهەتا وەكە ئیرۆ ئەو فەرمان ب وان نەگەهشتیە.

هەروەها ماكێنزی تەكەز كر وگۆت كو راستە ئەمریكا وێ ژمارەیا هێزێن خوە كێم بكە, لێ ب یەكجاری ڤەناكشینە , وهێزێن ئەمریكی وێ بۆ دەمەكە درێژ ل سووریا وعێراقێ بمینن ئەوژی داكو رووبرووێ هەژموونا ئێرانێ ل دەڤەرێ ببن .

رۆژنامەیا نیۆیۆرك تایمز ل سەر زارێ ماكنزی راگەهاند كو نها 5200 سەربازێن ئەمریكی ل عێراقێ هەنە وئەركێ وان هێزان رووبرووبوونا داعش وراهێنانكرنە ب ئارتێشا عێراقێ , وئەگەر هەیە د دەستپێكا مەها بێدە ژمارەیا وان بۆ 3000 سەرباز كێم ببە .

ودەربارێ ژمارەیا هێزێن ئەمریكی ل سووریێ رۆژنامەیا ناڤبووری تو زانیاریەك نەداخویاكرن , لێ ل گۆری داوین ئامار ژمارەیا هێزێن ئەمریكی ل پاییزا سالا بووری 1000 سەرباز بوو , ونها ژمارەیا وان 500 سەربازە , ویا هەری گرینگ ئەوە كو ماكێنزی تەكەز كریە كو ئەمریكا وێ بۆ دەمەكە درێژ ل عێراق وسووریێ بمینە.

رۆژانە هێزێن ئەمریكی گەرێن لەشكەری ل ناڤچەیێن سینووری یێن رۆژئاڤایێ كوردستانێ ئەنجام ددە , وب تایبەتی ل ناڤچەیێن كو بیرێن پەترۆلێ لێ هەنە , ود دەما داوی دە ئەمریكا گرێبەستەكە نەفتی ل گەل قەسەدە ئمزەكر , وشرۆڤەكار دبێژە ئەڤ واتەیا وێ چەندێ ددە كو ئەمریكا نە ب نیازە د دەمەكە نێزیك دە ژ رۆژئاڤایێ كوردستانێ ڤەكشە .

271