خرابوونا رەوشا خزمەتگوزاریێ ل رۆژئاڤایێ كوردستانێ بەردەوامە

ارك نیوز .. هینژی رەوش لرۆژئاڤایێ كوردستانێ خرابە و رۆژ ب رۆژ خرابتر و زەحمەتر دبە بسەدەما تێكچوونا رەوشا خزمەتگوزاریێ ژ ئالیەكی و تێكچوونا پێدڤیێن ژیانێ یێن سەرەكە ژ ئالیەكی دنڤە كو ئەڤ یەك هشتیە خەلكێن رۆژئاڤایێ كوردستانێ بزحمەتی دبارا ژیانا خوە بكن .

دەربارێ كریزا ئاڤێ لباژارێ حەسەكێ یێ رۆژئاڤایێ كوردستانێ نوچەگهانێ ئاركێ راگهاند كو پشتی زێدەتری یازدە رۆژان ژ برینا ئاڤێ ب یەكچاری لسەر تاخێن باژارێ حەسەكێ ژ ئالیێ گروپێن چەكدار یێن بسەر توركیێ ڤە ل سەری كانیێ ، نها رەوشا ئاڤێ ب ئاوایەیك دەسپێكی ئیدی تێ پەیداكرن و ئاڤ گهشتیە حەسەكێ .

لگۆری نوچەگهانێ مە دایە زانین كو باژارێ حەسەكێ د دەما نها دە لسەر پێنج بەشان هاتیە دابەشكرن كو رۆژانە ئاڤ دگهێژە چەند تاخەكی واتە هەر چار رۆژان رۆژا پینجان جارەكە دن ئاڤ ل هەمان تاخان تێ بەلاڤكرن ، وگۆت ژی تەڤی دابینكرنا ئاڤێ بئاوایەكی دەسپێكی لێ نابە جهێ كێف خوەشی و دل رەحەتیێ لجەم خەلكێن باژار ژبەر كو توو گەرەنتا بەردەوامیا ئاڤێ نینە و مەترسی هەیە كو جارەكە دن ئاڤ ژ ئالیێ گروپێن چەكدار یین بسەر توركیێ ڤە بێ برین .

دەربارێ رەوشا ئلكتریك و نان وپێدڤیێن ژیانێ یێن سەرەكە نوچەگهانێ مە دا خویاكرن كو هینژی رەوش وەكو خوەیە و توو چارەسەریەك حەتا نها نەهاتیە دیتن ژبەر ڤێ رەوشا خراب ئیدی خەلك ب زەحمەتی دبارا خوە دكن ، و سەرباركر ژی كو رەوش ب هەمان ئاوایی لباژارێ قامشلۆ یە و خەلك د رەوشەكە خراب دە دژین .

دەربارێ نرخێ دۆلارێ ئەمەریكی لبازاران و نرخێ كەل وپەلان نوچەگهانێ مە گۆت ئیرۆ نرخی یەك دۆلارێ ئەمەریكی ل همبەر لیرەیا سوری ل بازارێن رۆژئاڤایێ كوردستانی ب دووهەزار و دووسەد لیرەیی هاتە كرین و ب دووهەزار و دووسەد وبیست لیرەیی هاتە فرۆتن كو رۆژ ب رۆژ و نرخێ دۆلار تێ گوهەرتن و توو جێگیری حەتا نها تیدە چینەبوویە ، كو ئەڤ یەك هشتیە كو نرخێ تەڤایا كەل و پەلان و كەرەستەیێن خوارنی یێن سەرەكە وەكو خوە گران بمینە .

دڤێ دەربارێ دە خەلكێن رۆژئاڤایێ كوردستانێ دبێژن ئەگەر رەوش وەها بەردەوام ببە و رۆژ ب رۆژ خرابتر و زەحمەتر بوو بێ دیتنا توو چارەسەریەكێ د وێ دەمێ دە بەرێ رۆژئاڤایێ كوردستانێ بەرەڤ كارەسەتان ڤەیە .

400