ئەمینداریا گشتی یا ئەنەكەسە داخویانیەك دەربارێ خرابیا رەوشێ ل رۆژئاڤایێ كوردستانێ بەلاڤكر.
ارك نیوز... ئه‌مینداریا گشتی یا ئه‌نجوومه‌نا نشتیمانیا كورد ل سووریێ داخویانیه‌ك ده‌ربارێ ره‌وشا خرابا كو نها رۆژئاڤایێ كوردستانێ تێره ده‌رباس دبه به‌لاڤكر , وتێده گۆت كو رژێما ئه‌سه‌د ب چاره‌سه‌ریا سیاسی رازی نابه وته‌كه‌زیێ ل سه‌ر چاره‌سه‌ریا له‌شكه‌ری دكه.
د داخویانیا ئه‌منیداریا گشتی یا ئه‌نجوومه‌نا نشتیمانیا كورده هاتیه دئه‌نجاما ره‌وشا كاره‌ساتده یاكو ته‌ڤایا سووریێ گرتیه , ورژدبوونا رژێما ئه‌سه‌د ل سه‌ر چاره‌سه‌ركرنا كریزا سووریێ ب ریێا له‌شكه‌ری , وبه‌رده‌وامیا دۆرپێچكرنا ناڤچه‌یێن ژ ده‌رڤه‌یی كۆنترلا رژێما ئه‌سه‌ده وروخانا به‌هایێ له‌سه‌ریا سووری ل هه‌مبه‌ر دۆلارێ ئه‌مریكی , بارگرانی وزه‌حمه‌تیا ژیانێ ل ته‌ڤایا سووریێ دروست بوویه , وب تایبه‌تی ل پارێزگه‌هێن رۆژهلات یێن كو ده‌وله‌مه‌ندن ب سامانێن خوه تا ئاست گه‌هشتیه وێ چه‌ندێ كو رۆژ ب رۆژ وره‌وشا وه‌لاتیان ل وان پارێزگه‌هان به‌ره‌ڤ خرابوونێ بچه.
هه‌روه‌ها د داخویانیا ئه‌منیداریا گشتی یا ئه‌نه‌كه‌سه ده هاتیه كو دۆرپێچكرن نان ژی ل خوه گرتیه كو نه‌رخێ یه‌ك نانی پێنج جاران ژ نه‌رخێ به‌رێ گرانتر بوویه , وته‌ڤایا كه‌ل وپه‌لێن خوارنێ ژی گرانبوونه , وده‌رمان ئیدی ل وان پارێزگه‌هان نایێ دیتن , ود ده‌ما نهاده كێشه‌یا ئاڤێ ژی هاتیه هۆلێ كو ئه‌ڤ هه‌موو پێشڤه‌چوون بوونه سه‌ده‌م كو ئیدی وه‌لاتی ب ته‌نێ هزرا چاوه‌نیا دابینكرنا نانێ رۆژانه یێ زارۆكێ خوه بكه.
د داخویانیا ئه‌منیداریا گشتی ده هاتیه كو د ده‌ما نهاده پارێزگه‌ها حه‌سه‌كێ وگونده‌وارێ وێ راستی برینا ئاڤێ ب ئاوایه‌كی ئارمانجكری ژ ویسته‌گه‌ها عه‌لۆك هاتیه كو دبن ده‌ستێ چه‌كدارێن سه‌ر ب توركیا ڤه‌نه , وئه‌نجوومه‌نا نشتیمانیا كورد ل سووریێ بانگێ ل ئه‌مریكا ورۆسیا دكه كو رێكه‌فتن ل گه‌ل توركیا ئیمزه‌كرنه فشارێ بكن داكو ئاڤێ ب ئاوایه‌كی به‌رده‌وام بۆ پارێزگه‌ها حه‌سه‌كێ ژ ویسته‌گا عه‌لۆك وه‌ره دابین كرن, وژیانا وه‌لاتیان نه‌كه قوربانیا ناكۆكیان ناڤبه‌را ئالیێن ناكۆكدار ده .
ئه‌مینداریا گشتی یا ئه‌نجوومه‌نا نشتیمانیا كورد ل سووریێ گۆتژی كو ته‌ڤی هه‌بوونا بارگرانی وكریزان چه‌كدارێن په‌یه‌ده ده‌ست ب گرتنا جوانان ل سه‌ر رێبه‌ندان , ول سه‌ر كارێن وان كر كو ئه‌و جوان كار ژ بۆ دابینكرنا نانێ مالباتا خوه دكره , وئه‌و بۆ له‌شكه‌ریا نه‌چار برن, سه‌ربای ره‌ڤاندنا ژماره‌یه‌ك زارۆك ل سه‌ر ده‌رستێ چه‌كدارێن سه‌ر ب په‌یه‌ده ڤه .
د داخویانیێ ده هاتیه كو ئه‌نجوومه‌نا نشتیمانیا كورد ل سووریێ ب پێویست دزانه كو هه‌لممه‌تێن گرتنێ ژ بۆ له‌شكه‌ریا نه‌چار وه‌رنه راوه‌ستاندن , وته‌ڤایا جوان وزارۆكێن كو هاتنه ره‌ڤاندن سه‌ربه‌ست وه‌رنه به‌ردان , وئه‌نجوومه‌نا نشتیمانیا كورد هه‌ڤخه‌مێ وه‌لاتیانه د كێشه وئازارێن وان , ورێڤه‌به‌ریا په‌یه‌ده ب به‌رپرسیار دزانه د به‌ر خرابیا ره‌وشێ ده كو ته‌ڤایا سامانێن ده‌ڤه‌ه‌رێ دبن ده‌ستێ په‌یه‌ده ده .
ئه‌نجوومه‌نا نشتیمانیا كورد ل سووریێ بانگێ ل جڤاكا ناڤده‌وله‌تی ونه‌ته‌وێن یه‌كگرتی دكه كو ب ئاوایه‌كی بله‌ز ئالیكاریێن مرۆڤی پێشكێشی خه‌لكێ ده‌ڤه‌رێ بكن , وئه‌نجوومه‌نا نشتیمانیا كورد ل سووریێ ڤیتۆیا رۆسی صینی یا كو ل دژی گه‌هاندنا ئالیكاریان بۆ سووریێ هاته بكارئانین ب سه‌ده‌ما تێكچوونا بهترا ره‌وشێ دزانن , وداخواز ژ هه‌ردو وه‌لاتان كر كو ئالیكاربن د چاره‌سه‌ركرنا كێشه‌یان وكریزان ده , وهه‌روه‌ها ئه‌نه‌كه‌سه داخواز ژ ئه‌مریكا كر كو ده‌ڤه‌رێ دوور بگره ژ پرۆژه‌یاسایا سیزه‌ر .
228
