رێكەفتنا ئەمریكی – توركی ..نەئامادەبوون یان دوورخستنا قسد

أرك نيوز...تەڤی راگهاندنا رێكەفتنەكە ئەمریكی توركی دەربارێ ناڤچەیا ئارام و ئاگربەستەكە دەمكی ژبۆ رۆژهلاتێ فراتێ و رۆژئاڤایێ كوردستانێ، لێ داخویانیێن نەوەك هەڤ و جودا جودا ژ ئالێ هەر یەك ژ توركیە و هێزێن سووریایا دیموقراتیك قسد دەربارێ هورگولیان دەردكەڤن، وتا نها ئەو هورگولیێن داوی نەهاتنە زەلالكرن.

ل گۆری رێكەفتنا ئەمریكی توركی كو رۆژا پێنشەما بۆری هات راگهاندن، یەپەگە وێ هێزێن خوە تا كووراهیا 32 كیلۆمەترەیان ژ سینۆری توركیێ ڤەكشینە، هەروەها توركیە تو ئۆپەراسیۆنەكە لەشكەری ل كۆبانیێ ئەنجام نادە، و ئۆپەراسیۆنا توركی یاكو رۆژا نەهێ ڤێ مەهێ دەستپێكریە وێ پشتی ڤەكشانا یەپەكە راوەستە.
د ڤێ دەربارێ دە، سەرۆكێ توركیێ رەجەب تەیب ئەردۆگان دوه د كۆنگرەكی رۆژنامەڤانی دە راگهاند كو رێكەفتنا ئەمریكی توركی ژ كۆبانی تا سینۆرێ عێراقێ لخوە دگرە بكووراهیا 32 كیلۆمەترەیان و درێژاهیا 440 كیلۆمەتەریان، لێ بەرۆڤاژیێ وێ یەكێ سەركردەیێ گشتی یێ قسد، مەزلووم عەبدێ دبێژە ئەو رێكەفتن تەنێ ناڤچەیێن پەڤچوونان ژ سەرێ كانیێ تا گرێ سپی لخوە دگرە.

سەرۆكێ توركیێ هەروەها گۆت ئەوێ رەوشا باژارێ قامشلۆ د چارچۆڤەیا ناڤچەیا ئارام دە ب هەڤشانێ خوە یێ رۆسی فلادیمێر پووتین رۆژا سێشەمبا بێ گەنگەشە بكە.

هەر دەربارێ داخویانیێن جودا جودا، وەزیرێ دەرڤە یێ توركیێ مەولوود چاووش ئۆگلۆ هورگولینە دن ئەشكەرەكرن و گۆت ناڤچەیا ئارام یا ژ كۆبانی حەتا سینۆرێ عێراقێ لخوە دگرە، وێ بتمامی لژێر كۆنترۆلا توركیێ دە بە و یەپەگە ژی دێ چەكێن خوە یێن گران رادەستی ئەمەریكایێ بكە.

مەزلووم عەبدێ ژی د داخویانیەكە رۆژنامەڤانی دە پشتی راگهاندنا رێكەفتنا توركی ئەمریكی گۆت ئەو بـ گەنگەشەیێن توركی ئەمریكی بەریا راگهاندنا رێكەفتنێ ئاگەهداربوون و ئەو گەنگەشە سێ رۆژان درێژكرن، و گۆت كو ئەو رێكەفتن تەنێ ناڤچەیا ژ سەرێ كانیێ تا گرێ سپی لخوە دگرە، و هین تو گەنگەشە لسەر ناڤچەیێن دن نەهاتنە كرن، و دا زانین كو قسدێ وێ ل وان ناڤچەیان بمینە.

ناڤبەرا خالێن رێكەفتنا ئەمریكی توركی و نێزیكبوونا بداویهاتنا دەما ئاگربەستێ، و داخویانیێن جودا جودا و نەوەكهەڤ ناڤبەرا توركیێ و قسدێ دە، توركیێ لسەر ئاستەكە دیپلۆماسی دلڤە و سۆزا بەردەوامكرنەكە توند ژبۆ ئۆپەراسیۆنا خوە ددە ئەگەر خالێن وێ رێكەفتنێ نەهاتن بجیكرن دە، مەترسیا قوربانیدان و دەربەدەریكە بهتر نەخاسم د چارچۆڤەیا نەبوونا تو رێكەفتنەكە سیاسی ژبۆ گەرەنتیا مافێ كورد و سلامەتیا سڤیلان ل سووریێ و دوورخستنا وان ژ شەر، هین لداره.

307