عه‌فرین, سه‌رێ كانیێ و گرێ سپی ژ بیر نه‌كن
عه‌فرین, سه‌رێ كانیێ و گرێ سپی ژ بیر نه‌كن
شێخۆ عە‌فرینی
د 16ێ ڤێ مه‌هێ ده, گاڤه‌ك دیرۆكی ناڤبه‌را هه‌ردو ئالیێن كوردی یێن سه‌ره‌كه ل رۆژئاڤایێ كوردستانێ ده هات ئاڤێتن. وه‌كو نێزیكبوونه‌كێ ناڤبه‌را ئەنەكەسێ و پەیەدێ ده چێ بوو, و بنگه‌هه‌ك ژ ئیمزه‌كرنا رێكه‌فتنه‌كه نوو, ل گۆر رێكەف‌تنا دهۆكێ یا كو ب سه‌رپره‌شتیا سه‌رۆكێ گه‌لێ كورد, و لێڤه‌گه‌رێ سیاسی رێزدار مسعود بارزانی, سالا 2014ان ده, هاتبوو پێكانین, هات داین.
بێ گومان ئەو گاڤ دلێ هه‌ر كورد په‌روه‌ره‌كی, وه‌لاتپارێزه‌كی و خه‌مخورێ دۆزا كوردی شاد و كێفخوه‌ش كر. نه‌خاسم كو ناكۆكیێن هه‌ردو ئالیان, ژ ده‌ما كریزا سووریێ ڤه, ده‌رئه‌نجامن خه‌راب ب خوه ره ئانین, وه‌ك ژده‌ستدانا عە‌فرین, سه‌رێ كانیێ و گرێ سپی, هه‌روها بوو سه‌ده‌ما كۆچكرنا ب ده‌هێ هه‌زاران ژ رۆژئاڤایێ كوردستانێ, و به‌ر ب ئە‌ورۆپایێ و وه‌لاتن دن ڤه چوون.
هه‌ر ئالیه‌كی سیاسی, جڤاكی ل باكور, رۆژهلات, باشوور و رۆژئاڤایێ كوردستانێ پشتا خوه دا ڤێ گاڤێ, و بانگا به‌رده‌وامبوونێ كر, دا كو بگهن ئەنجامه‌ك باش و گونجاو تێكه‌ڤه به‌رژه‌وه‌ندیا كوردان ده..
ته‌ڤی دلخوه‌شیه‌ك ل جەم وەلاتییان چاند, لێ هنه‌ك نه‌رحه‌تی ژی ل با خەلكێ عە‌فرین, گرێ سپی و سه‌ر كانیێ ده ئافراند ودروست كر, كو مژارا هه‌رێمێن وان د وێ پێڤاجۆیێ ده تونه به. ئەو كوردێن به‌له‌نگاز و هه‌ژار یێن كو ژ بێهتر دو سالان ڤه راستی كۆمكوژیان تێن, كوردێن كو چاڤێن وان ل ڤه‌گه‌را وار, مال و ملكێن خوه نه, كوردێن كو تو جوره‌ك تاوانان نه‌ما و ب سه‌رێ وان ده هات.
له‌وما بانگا هەر كوردەكی ل هەرێمێن ناڤبووری ژ ئەنەكەسێ و پەیەدێ ئەوە: عە‌فرین, سه‌رێ كانیێ, و گرێ سپی ژ بیر نه‌كن, بلا دۆسەیا وان ژی د ناڤ دانووستاندن, دیالۆگ, هه‌ڤدیتن و جڤینێن وه ده هه‌به. وان باژاران ژ چه‌ته, نادۆزان و داگيركه‌ران رزگار بكن ,و خوه‌شیێ دەرباسی دلێ وان ژی بكن.
المقال يعبر عن رأي الكاتب
1001
