ئۆغلۆ: ئەمریكا د ئاڤاكرنا ناڤچەیا ئارام دە نە جدیە

آرك نيوز...تەڤی كو ناڤچەیا ئارام رۆژا یەكەشەمێ كەتە وارێ جیبجیكرنێ دە لێ توركیا هینا د گەفێن ئەنجامدانا ئۆپەراسیۆنا لەشكەری ل رۆژهلاتێ چەمێ فەراتێ بەردەوامە , ودبێژە كو ئەمریكا د پێنگاڤێن ئاڤاكرنا ناڤچەیا ئارام دە نە جدیە .

مەولوود چاویش ئۆغلۆ وەزیرێ دەرڤەیێ توركیا د كۆنگرەیەكی رۆژنەمەڤانی دە راگەهاند كو پێنگاڤێن ئاڤاكرنا ناڤچەیا ئارام ل رۆژهلاتێ چەمێ فەراتێ ژ ئالیێ ئەمریكاڤە نەجدینە , وئەمریكا ناخوازە دۆسەیا ناڤچەیا ئارام د دەمەكە نێزیك دە وەرە یەك ئالیكرن .

هەروەها وەزیرێ دەرڤەیێ توركیا تەكەز وگۆت كو توركیا تەڤایا ئامادەكاریان كریە داكو رۆژهلاتێ چەمێ فەراتێ ژ چەكدارێن پەیەدە ڤالە بكە , وهۆشداری دا وگۆت كو توركیا رژدە ل سەر هەلوێست وسیاسەتا خوە .

هەر د ڤێ دەربارێ دە رەجەب تەیب ئەردوغان سەرۆكێ توركیا د هەمان رۆژا كو دەوریێن ئەمریكی توركی یێن هەڤبەش ل گرێ سپی دەستپێكرن راگەهاند كو توركیا ب ڤی ئاوایی رازی نابە ناڤچەیا ئارام وەرە ئاڤاكرن , وب رێڤەچوونا دەوریێن هەڤبەش ل رۆژهلاتێ چەمێ فەراتێ نایێ واتەیا ئاڤاكرنا ناڤچەیەكە ئارام .

هەروەها ئەردوغان تەكەز كر وگۆت كو ئەگەر د داویا ڤێ مەهێ دە ناڤچەیا ئارام ل گۆری داخوازێن توركیا نەوێ ئاڤاكرن , توركیا وێ پلانێن تایبەت ل ناڤچەیێ بجی بكە , وتوركیا رژدە ل سەر پلانێن خوە یێن تایبەت .

وژئالیێ خوەڤە رژێما ئەسەد ئەنجامدانا دەوریێن هەڤبەش یێن ئەمریكی وتوركی ل رۆژهلاتێ چەمێ فەراتێ ئیدانەكرن , وگۆت كو ئەڤ پێنگاڤ بنپێكرنە ژ تەڤایا یاسایێن ناڤدەولەتی رە .

332