ئەردوغان : پێشهاتەیێن سووریێ بۆ توركیا چارەنڤیسسازن

آرك نيوز...د جڤینەكە ئەندام وئالیگرێن پارتیا داد وگەشەپێدانێ دە , ئەردوغان تەكەز كر كو پێشهاتە وپێشڤەچوونێن سووریێ , ورۆژهلاتا دەریایا ناڤین بۆ توركیا چارەنڤیسسازن.

رەجەب تەیب ئەردوغان د گوتارەكێ دە راگەهاند كو توركیا نكارە ب تەنێ چاڤدێر بە ژ رەوشا دەڤەرێ رە , وتوركیا رژدە ل سەر پاككرنا رۆژهلاتێ چەمێ فەراتێ ژ چەكدارێن پەیەدە یێن سەر ب پەكەكە ڤە .

ئەردوغان گۆتژی كو رۆلا توركیێ د سووریێ دە گەلەك ئەرێنی بوو , وبوو رێگری ل پێشیا رژاندنا ب سەدان هەزار وەلاتیێن سڤیل یێن سووریێ , وئەگەر ئێریشێن لەشكەری یێن توركیا نەبا , باكوورێ سووریێ ژ گرووپێن چەكدار وتەرۆرێ نەدهاتە پاككرن .

د بەردەوامیا گۆتنا خوەدە ئەردوغان گۆت كو پێشهاتەیێن سووریێ , ورۆژهلاتا دەریایا ناڤین بۆ توركیا چارەنڤیسسازن , لەوما توركیا نكارە وەكە چاڤدێر ژ رەوشێ رە بمینە , وپێویستە خوەدان رۆلەكە سەرەكە بە .

دەربارێ رۆژهلاتێ چەمێ فەراتێ ئەردوغان گۆت كو دۆسەیا رۆژهلاتێ چەمێ فەراتێ ل سەر مێزا گۆتووبێژیانە , وتوركیا رژدە ل سەر ئێریشكرنێ وپاككرنا ناڤچەیێ ژ چەكدارێن پەیەدە .

ئەردوغان د گوتارا خوەدە بەحسا رەوشا پەنابەرێن سووریێ كر وگۆت كو هەتا وەكە نها بهتر ژ 7 مەلیۆن كەسێ سڤیل ب نەچاری ژ سووریێ دەركەتنە , وبەرێ خوە دانە وەلاتێن هەرێمی ویێن یەكیتیا ئۆرۆپا , ونیڤێ وێ ژمارەیا پەنابەران ل توركیا نێشتەجێنە .

د داویا گۆتنا خوەدە سەرۆكێ توركیا تەكەز كر , هەبوونا ئارتێشا توركیێ د سووریێ وعێراقێ دە رێگریێ ل هەبوونا پەكەكە ل وان ناڤچەیان دكە .

354