پەیەدە ئامادەكاریێن ڤەكشانێ ژ گرێ سپی وسەرێ كانیێ دكە
آرك نيوز..ئەكادیمیناسەكی عەرەب ئەشكەرەكر كو پەیەدە دەست ب ڤەكشانێ ژ گرێ سپی وسەرێ كانیێ كریە , وچەندین پرۆسەیێن ڤەكشانێ ل سەر عەردێ هاتنە جیبجیكرن .
دكتۆر فراس ممدوح الفهد ئەكادیمیناسێ عەرەب ل سەر رووپەلا خوە یا فێسبووكێ بەلاڤكریە كو چەكدارێن پەیەدە ل گرێ سپی وگوندەوارێن وێ , كۆلاندنا تونێل وخەندەكان ب تەمامی راوەستاندیە.
هەروەها ئەكادیمیناسێ عەرەب ئەشكەرەكریە كو ل باژارێ سەرێ كانیێ ژی , چەكدارێن پەیەدە پرۆسەیا كۆلاندنا تونێل وخەندەكان راوەستاندیە , وتەڤایا ئامێرێن كۆلاندنێ بۆ گوندێ الدوێرە كو دكەڤە باشوورێ باژار دە ڤەگوهاستنە .
وی ئەكادیمیناسێ عەرەب گۆتژی كو چەكدارێن پەیەدە چەكێن گران , ژ دەڤەرا تل حلف كو دكەڤە رۆژئاڤایێ باژارێ سەرێ كانیێ دە , بۆ باشوورێ باژارێ سەرێ كانیێ ڤەگوهاستنە .
هەروەها دكتۆر فراس ممدوح الفهد سەرباركر وگۆت كو چەكدارێن پەیەدە خالێن لەشكەری ل گوندێ " نص تل " ل باژارۆكێ سلۆك كو دكەڤە باكوورێ رەقایێ دە ڤالەكرنە , ورێكارێن خوەپاراستنێ راوەستاندنە .
ناڤهاتی ئەشكەرەكر كو پەیەدە دەست ب راكرنا بۆمێن چاندی ل گوندێن هەڤسنووری ب توركیێ رە كریە , وئەمریكا دەوریێن سەربازی یێن تایبەت ل وان دەڤەران ب رێڤە دبە .
د داویا گۆتنا خوەدە دكتۆر فراس ممدوح الفهد گۆت كو ل باژارێ سەرێ كانیێ ئەو چەند ژی هاتیە دیتن , كو كەل وپەلێن ناڤ مال ژ باژار هاتنە دەرخستن , وبۆ جهەكی نەدیار هاتنە ڤەگوهاستن .
وژئالیێ خوەڤە ئاركێ پەیوەندی كر داكو راستیا ڤان زانیاریان پشتراست بكە , وئەكادیمیناسەكی كورد كو نەخوەست ناڤی وی وەرە ئەشكەرەكرن , تایبەت ژ ئاركێ رە گۆت كو ئەو زانیاری هەموو راستن , ول سەر عەردێ ئەو گۆتنێن كو دكتۆر فراس ممدوح الفهد بەلاڤكرنە هاتنە جیبجیكرن .
287
