ئاكار: دانوستاندن دەربارێ ناڤچەیا ئارام ناڤبەرا توركیا وئەمریكا دە وێ بەردەوام بن

آرك نيوز...جێمس جێفری شاندەیێ ئەمریكا یێ تایبەت ژ بۆ سووریێ كو دوه دوشەمێ گەهشتە ئەنقەرا پایتەختا توركیێ , ل گەل بەرپرسیارێن توركیا داوین پێشهاتەیێن سووریێ گۆتووبێژ كرن.

خەلووسی ئاكار وەزیرێ بەرەڤانیا توركیا راگەهاند كو ل گەل جێمس جێفری شاندەیێ تایبەتێ ئەمریكا ژ بۆ سووریێ رەوشا سووریێ ب گشتی وئاڤاكرنا ناڤچەیا ئارام ل رۆژهلاتێ چەمێ فەراتێ هاتە گۆتووبێژكرن .

هەروەها خەلووسی ئاكار دازانین كو شاندەیێن ئەمریكی وتوركی یێن لەشكەری وێ د ئەنجامدانا گۆتووبێژیێ دە وهەروەها راوێژكاریێ دەربارێ ئاڤاكرنا ناڤچەیا ئارام دە بەردەوام بن .

وەكە وەزیرێ بەرەڤانیا توركیا راگەهاندیە ئەمریكا وتوركیا ل سەر دابینكرنا كەش وهەوایێ ژ بۆ ڤەگەرا پەنابەرێن سووریێ بۆ سەر زێدێن خوە رێكەفتنە .

و ل گۆری كو رۆژنامەیا شرق الاوست بەلاڤكربوو جێمس جێفری شاندەیێ تایبەتێ ئەمریكا یێ تایبەت ژ بۆ سووریێ وێ ل ئەنقەرا ل گەل بەرپرسیارێن توركیا , ناڤچەیا ئارام یاكو بریارە ل رۆژهلاتێ چەمێ فەراتێ وەرە ئاڤاكرن , ونەخشەریێا ئەمریكی توركی دەربارێ منبجێ گۆتووبێژ بكە , لێ خەلووسی ئاكار ب تو ئاوایەكی بەحسا نەخشەریێا باژارێ منبجێ نەكر .

ل گۆری زانیاریێن تایبەت یێن كو ب دەستێ ئاركێ گەهشتنە , ئەمریكا پێشنیارا ئاڤاكرنا ناڤچەیەكە ئارام كو بەرفەرەهیا وێ ژ ( 7-14 ) كیلو مترانە ژ بۆ توركیا كریە ودرێژیاهیا وێ ناڤچەیێن سنووری یێن توركیا وسووریا نە .

ل گۆری كو هاتیە راگەهاندن هەتا وەكە نها ئەمریكا رازیبوون ل سەر پێشنیارا توركیا دەربارێ درێژبوون وبەرفەرەهبوونا ناڤچەیا ئارام ل رۆژهلاتێ چەمێ فەراتێ نیشان نەدایە.


وژئالیێ خوەڤە شون رۆبرتسۆن بەردەڤكێ وەزارەتا بەرەڤانیا ئەمریكا راگەهاند كو گۆتووبێژی ناڤبەرا ئەمریكا وتوركیا دە دەربارێ ناڤچەیا ئارام ونەهشتنا مەترسیێ ل جەم توركیێ بەردەوامن , وئەو گۆتووبێژی وێ بەردەوام بن .

هەروەها مارلۆ كرۆس دوران بەردەڤكێ وەزارەتا دەرڤەیا ئەمریكا ژ بۆ رۆژنامەیا شرق الاوست راگەهاند كو جێفری د گەرا خوەدە بۆ وەلاتێن یەكیتیا ئۆرۆپا تەكەزی ل سەر وێ چەندێ كریە كو كارێ پێشینە یێ ئەمریكا د سووریێ دە چارەسەركرنا كریزا سووریێ یە ل گەل نەتەوێن یەكگرتی وجڤاكا ناڤدەولەتی , ورۆسیا ژی وێ هەڤبەش بە د چارەسەركرنا كریزا سووریێ دە ل گەل بریارا ئەنجوومەنێ ئەولەهیا ناڤدەولەتی 2254 .

512