عەبدولکەریم موحەمەد: فێفتی فێفتی بوویە ژ دەما بۆری، ھەر رێکەفتنەک ناڤبەرا ئەنکس و پ ی د دێ ب سەرپەرەشتیا نەتەوەیێن یەكگرتی بە

ئەندامێ پۆلیتبیرۆیا پارتیا دیموقراتا کوردستان-سووریا، عەبدولکەریم موحەمەد گۆت کو دۆزا نیڤ ب نیڤێ ئانگۆ فێفتی فێفتی بوویە ژ دەما بۆری، و ھەر رێکەفتنەک ناڤبەرا ئەنجوومەنا نشتیمانییا کوردی ل سووریێ ئەنکس و پارتیا یەکیتیا دەمۆکراتیک پ ی د دە وێ ب سەرپەرەشتیا نەتەوەیێن یەکگرتی بە.

د لێدوانەکە تایبەت دە ژ بۆ مالپەرا المۆنیتور دەربارێ ھەولێن نێزیکرنا ئەنکس و پ ی د و دەستپێشخەریا فرانسی و میکانیزما ئاڤاکرنا رێڤەبەریەکە نوو ل ناڤچەیێ، موحەمەد گۆت ”ئەمێ بەرێ خوە بدن رێڤەبەریەکە نوو، ڤێ جارێ دێ ب پشتەڤانیا ھەڤپەیمانیا ناڤدەولەتی و وزارەتا دەرڤەیا ئەمەریکایێ بە، ھەروەھا ئۆفیسێن نەتەوەیێن یەكگرتی وێ رۆلەکە گرنگ و سەرەکە تێ دە بلیزن، ئەو ھەمان ئۆفیس و دەستەنە یێن کو سەرپەرەشتیا دانووستاندنێن جنێڤ، و کۆمیتەیا دەستووری و دەستەیا دانووستانکار دکن، ژ بۆ وێ یەکێ ھەر رێکەفتنەک ناڤبەرا ھەردو ئالیێن کوردی، دێ ب سەرپەرەشتیا وان ئۆفیسێن ناڤبۆری بە.”

موحەمەد سەربار کر ”دۆزا نیڤ ب نیڤێ ئانگۆ فێفتی فێفتی بوویە ژ دەما بۆری، رێڤەبەریا نوو وێ نە نیڤ ب نیڤێ ناڤبەرا ھەردو ئالیێن کوردی بە، لێ ھەموو پێکھاتە و ئالیێن دن دێ بەشدار بن...ب نەرینا من ئەمەریکا دێ رێژەیا بەشداریا ھەموویان د رێڤەبەریێ دە دەستنیشان بکە.”

447