د ئەنجاما بەردەوامیا ئێریشێن ریژیما ئەسەد لسەر ئدلبێ قربانی كەتن
ارك نیوز .. جارەكە دن چەكدارێن رێژیما ئەسەد ئێریشی گوندەوارێ ئدلبێ كر كو د ئەنجاما وێ ئێریشێ دە هەژمارەك قربانی كرتن .
چالاكڤانێن دناڤا گوندەوارێ ئدلبێ دە راگهاندن كو رۆژا بووری بالافرێن شەركەر یێن رێژیما ئەسەد باژارۆكێ كفریا لباكورێ گوندەوارێ ئدلبێ كرە ئارمانج و د ئەنجامێ سێ وەلاتیێن سڤیل جانێ خوە ژ دەست دان و یازدە كەسێن دن دناڤ واندە زارۆك ژی هەبوون برینداربوون و ژ ئالیێ تیما بەرەڤانیا سڤیل ڤە هاتن ڤەگوهەستن ژبۆ نەخوەشخانەیان .
هەمان چالاكڤانان ئەشكەرە كرن كو د ئەنجاما بومبەبارانكررنا باژارێ خان شێخون لگوندەوارێ ئدلبێ ژ ئالیێ بالافرێن ریژیمێ ڤە كومكوژیەك هاتە ئەنجام دان ونەه سڤیلان دناڤ واندە زارۆك ژی هەبوون چانێ خوە ژ دەست دان وهەژمارەك كەسێن دن ژی بریندار بوون و ژبۆ نەخوەشخانەیان هاتن ڤەگوهەستن .
ژێدەرێن خوەجەهی ژناڤا باژارێ ئدلبێ راگهاندن كو ژ ئالیێ خوەڤە ژی بالافرێن شەركەر یێن روسی پەناگەهەكە سڤیلان كرە ئارمانج كو د ئەنجامێ دە دوو مالبات كو ژ نەه كەسان پێك دهات هاتن كوشتن و تەرمێن وان ژ ئالیی تیما بەرەڤانیا سڤیلا سوری ڤە ژبن كاڤلان هاتە دەرخستن .
هەروەها ژ ئالیێ خوەڤە تۆرا سوریێ یا مافێ مرۆڤاند راپۆرتا خوە دە ب بەلگە ئەشكەرە كر كو ژ مەها نیسانا بووری وتا نها د ئەنجاما بەردەوامیا ئێریشێن ریژیما ئەسەد وروسیا لسەر دەڤەرێن لباكورێ سوریێ بێهتری 606 سڤیل دناڤ واندە157 زارۆك و111 ژن ژی دناڤ وان دە هەبوون جانێ خوە ژ دەست دان .
هەمان تۆرێ د راپۆرتا خوە دە دا خویاكرن كو بێهتری 521 سڤیل دناڤ واندە 136 زارۆك و 97 ژن هەنە لسەر دەستێ رێژیمێ هاتنە كوشتن سەرباری پێكئانینا بیست وسێ كومكوژیان ، هەروەها هەیشتی وپینج سڤیل كو دناڤ دە بیست ویەك زارۆك و چاردە ژن هەبوون ژ ئالیێ روسیا ڤە هاتن كوشتن لگەل ئەنجامدانا چار كومكوژیان ل دەڤەرێ .
هەمان راپۆرتێ دا زانین ژی كو د بەرەدوامیا ئێریشێن رێژیما ئەسەد لسەر باژارێ ئدلبێ و گوندیوارێ وی بكێمانی هەیشت كادرێن پزیشكی ژ ئالیێ ریژیمێ ڤە هاتن كوشتن و چار كادرێن بەرەڤانیا سڤیلژی لسەر دەستێ روسیێ جانێ خوە ژ دەست دان .
رۆژانە باژار وباژارۆكێن لباكورێ سوریێ راستی ئێریشێن تووند ژئالیێ بالافرێن شەركەر یین روسی ورێژیمێ ڤە تێن و د ئەنجامێ دە رۆژانە هەژمارەك قربانی ناڤبەرا كوشتی وبریندار دكەڤن سەرباری روودانا زیانێن مادی مەزن ل دەڤەری .
377
