هێزێن دیموقراتی یێن كوردی ل سووریێ بەرپرسیارەتیا رەڤاندنا جەمیل ئەبۆ عادل ل ستوویێ رێژیما سووریێ دگرن

هێزێن دیموقراتی یێن كوردی ل سووریێ بەرپرسیارەتیا رەڤاندنا جەمیل ئەبۆ عادل ل ستوویێ رێژیما سووریێ دگرن و دبێژە تا نها چارەنڤیسا ئەبۆ عادل نەدیارە.


د داخویانیەكێ دە ب هەلكەفتا سالڤگەرا حەفتان یا رەڤاندنا جەمیل ئەبۆ عادل ژ ناڤا باژارێ قامشلۆ، ئۆفیسا جیبجیكار یا هێزێن دیموقراتی یێن كوردی ل سووریێ گۆت د رۆژەكە وەكە ئیرۆ دە د سالا 2012ان دە، كەسنە درندە و چەتە قەهرەمانترین كەس دناڤا هێزێن دیموقراتی یێن كوردی ل سووریێ دە دەما ژ ئەركەكی نەتەوەیی و نشتیمانی ڤەدگەریا رەڤاند.

هێزێن ناڤبۆری د داخویانیا خوە دە هەروەها دبێژن جەمیل ئەبۆ عادل دەنگەگی ئازاد و بهێز د ئاسمانێ قامشلۆ دە بوو و سمبۆلا شۆرەشا سووریێ ل باژارێ قامشلۆ بوو، لێ دەستێن غەدر و خیانەتێ پلانێن خوە ژبۆ بداویكرنا وێ دەنگێ ئازاد، ئانگو دەنگێ جەمیل ئەبۆ عادل دانین و پێك ژی ئانین.

هێزێن ناڤبۆری دەربارێ ئالیێ كو ئەبۆ عادل رەڤاندی دبێژە گەلەك ئالیان بەشداری د رەڤاندنا ئەبۆ عادل دە كریە، هنان فەرمان دان و هنان ژی بجی ئانین، هەروەها هێزێن دیموقراتی یێن كوردی ل سووریێ بەرپرسیارەتیا رەڤاندنا جەمیل ئەبۆ عادل ل ستوویێ رێژیما سووریێ دگرن و دبێژن تا نها وان نەكارینە تو زانیاریان ل سەر چارەنڤیسا ئەبۆ عادل بدەست بخن.

261