دەستپێشخەریا فرەنسی بەرەڤ كوودەرێ ڤە دچە؟
ئەڤە دەمەكە بەحسا دەستپێشخەریەكە فەرنسی ژبۆ نێزیككرنەكێ ناڤبەرا ئەنجومەنا نشتیمانی یا كوردی ل سووریێ و پارتیا یەكیتیا دیموقراتیك پەیەدێ تێ كرن، لێ د ڤان رۆژێن داویێ دە داخویانینە جودا جودا دەربارێ وێ دەستپێشخەریێ دەركەتن.
پێنگاڤا یەكەم ژبۆ دەستپێشخەریا فەرنسی ئەوە كو ئاتمۆسفێرەكە خوەش ژبۆ ئاڤاكرنا باوەریێ ناڤبەرا هەردوو ئالیان دە وەرە ئەنجامدان، لێ لگۆری داخویانیان كو تا نها تو پێنگاڤ نەهاتنە ئاڤێن، سەركردەیەیێ تەڤگەرا جڤاكا دیموقراتیك تەڤدەم یا بسەر پەیەدێ ڤە ئالدار خەلیل بەریا چەند رۆژان د داخویانیەكە رۆژنامەڤانی دە گۆت كو ئەنجومەنا نشتیمانی یا كوردی ل سووریێ لیستەنە نەراست دەربارێ گرتیێن د زیندانێن پەیەدێ دە رادەستی ئالینە ناڤدەوەلتی دكە.
لگۆری ئەنجومەنا نشتیمانی یا كوردی ل سووریێ كو یەك ژ خالێن ئاڤاكرنا باوەریێ سەربەستبەردانا گرتیانە، د ڤێ دەربارێ دە ژی بەشار ئەمین ئەندامێ پۆلیتبیرۆیا پارتیا دیموقراتا كوردستان سووریا ژ ئاركێ رە گۆت كو وان لیستەیەك بناڤێ دۆزدە گرتیان رادەستی پەیەدێ د چارچۆڤەیا دەستپێشخەریا فرەنسی دە كریە، لێ تا نها پەیەدێ تو گرتی سەربەست بەرنەدانە و تو پێنگاڤ ژبۆ ئاڤاكرنا باوەریێ نەئاڤێتنە.
هەر ل سەر ڤێ بابەتێ، دوه ژی فۆاد عەلیكۆ ئەندامێ كۆمیتەیا سیاسی یا پارتیا یەكیتی یا كوردی ل سووریێ د بەشداریەكە خوە د بولتەنا ئاركێ دە گۆت كو ئالدار خەلیل ب ڤان داخویانیێن خوە تنەكرنا دەستپێشخەریا فرەنسی راگهاند و گۆت ئەو دێ وێ هەلوەستا خوە ژبۆ فرەنسیان ژی ڤەگوهێزە.
شەرێ داعشێ بداوی هات، و پشتی دەردۆرا حەفت سالان ژ دەستهلاتا پەیەدێ، هین تو ئعترافەكە فەرمی نە ژئالیێ دەستوورا سووریێ ڤە و نەژی ژ ئالینە هەرێمی و ناڤدەوەلتی ب رێڤەبەریا پەیەدێ نەهاتیە كرن، و پەیەدێ نەكاریە خوە بگهینە ماسا دانوستاندنان یا ناڤدەوەلتی دەربارێ سووریێ.
281
