دهەیاما مەهەكێ دە ئۆجەلان 2 جاران ب پارێزەرێن خوەرە جڤیا

آرك نيوز..د دەما مەهەكێ دە دەرگەهێ گراڤا ئیمرالی یا توركی ل پێشیا پارێزەرێن عبدالله ئۆجەلان رێبەرێ پەكەكە هاتە ڤەكرن , وپارێزەرێن وی ل گەل جڤیان .

ژێدەرێن راگەهاندنێ یێن توركیا بەلاڤكرن كو دوه چارشەمێ هەردو پارێزەرێن عبدالله ئۆجەلان رێبەرێ پەكەكە یێن ب ناڤێن رێزان ساریجا , ونورۆز یۆسال بەرەڤ زیندانا گراڤا ئیمرالی ب رێكەتن , ول گەل عبدالله ئۆجەلان جڤیان , وهەتا پشتی نیڤرۆێ ل ئیمرالی مان .

ژێدەرێن راگەهاندنێ یێن توركیا نەدانە خویاكرن گەلۆ پارێزەرێن عبدالله ئۆجەلان وێ ڤێ جارێ تو نامەیان بەلاڤن بكن یا نا , وەكە چاوە بەریا نها نامە بەلاڤكن .

د دوێ ڤێ مەهێ دە ئەنقەرا بریارا قەدەغەكرنا سەردانا عبدالله ئۆجەلان ژ ئالیێ پارێزەرێن وی ڤە هلوەشاندن ئەوژی پشتی دەرباسبوونا هەشت سالان ژ قەدەغەكرنێ , و عبدالحمید گۆل وەزیرێ دادا توركیا د كۆنگرەیەكی رۆژنەمەڤانی دە راگەهاند كو ئیدی پارێزێن عبدالله ئۆجەلان رێبەرێ پەكەكە كارن سەردانا وی بكن , وبریارا قەدەغەكرنا سەردان هاتە هلوەشاندن .

دەما كو د دوێ ڤێ مەهێ دە پارێزەرێن ئۆجەلان سەردانا وی كرن , ئۆجەلان د نامەیا خوەدە داخواز ژ قەسەدە وپەكەكە كر كو كێشەیان ل گەل توركیا د ریێا دیالۆگێ ڤە چارەسەر بكن , ومەترسیێن توركیا یێن سنووری ل بەر چاڤ بگرن , وپێویستە سنوور وئەولەهیا توركیا پاراستی بە .

وپشتی كو عبدالله ئۆجەلان ئەڤ نامە د ریێا پارێزەرێن خوەڤە بەلاڤكر , كۆما جڤاكێن كوردستانێ ئەڤ نامەیا ئۆجەلان رەتكر , وگۆت كو ئەڤ نامە د بن باندۆرا توركیا دە هاتیە نڤیساندن , وئەو پابەندیێ ب ڤێ نامەیێ ناكن .

عبدالله ئۆجەلان رێبەرێ پەكەكە ژ سالا 1999 ان ڤە , ژ ئالیێ توركیا ڤە هاتیە دەستەسەركرن , وژ وێ رۆژێ ڤە وهەتا وەكە ئیرۆ د زیندانێ دەیە , وژ سالا 2011 ان ڤە توركیا سەردان ژ بۆ ئۆجەلان قەدەغەكریە.
ز.ح

869