پ ی د رێ لبەر فرۆتنا گەنم بۆ رێژیمێ ڤەكر

تەڤی كو مژار بوو جهێ نەرازیبوون و گەنگەشەیێ، رێڤەبەریا پارتیا یەكیتیا دیموقراتیك پەیەێ تو گوهەرتن د نرخێ كو دەستنیشانكریە ژبۆ كرینا گەنم ژ جۆتكاران پێك نەئانی، لێ ب ئەشكەرە گۆت ئێدی جۆتكار د فرۆشتنا بەرهەمێ خوە یێ گەنم ژبۆ رێژیم یان پەیەدێ ئازادن.

هەڤسەرۆكێ دەستەیا ناڤ لێ تێ كرن ئابۆری و چاندنی یا رێڤەبەریا پەیەدێ سەلمان باروودۆ د داخویانیەكە رۆژنامەڤانی دە گۆت كو چۆتكار خوەدی مافە ب هلبژارتنا ئالیێ كو دخوازە بەرهەمێ خوە یێ گەنم بفرۆشیێ، چ رێژیما ئەسەد یان رێڤەبەریا پەیەدە بە، ب مەرجێ كو ئەو بەرهەم ل ناڤچەیێ بمینە.

رێڤەبەریا پەیەدێ بەریا چەند رۆژان نرخێ كرینا یەك تەن گەنم د وەرزێ ئیسال دە ژ چۆتكاران ب 150 هەزار لێرەیێن سووریێ دەستنیشان كر، كو د وەرزێ سالا بۆری دە نرخێ كرینا یەك تەن گەنم ب 175 هەزار لێرەیی دەستنیشان كربوو.

د بەرامبەر دە رێژیما ئەسەد نرخێ كرینا یەك تەن گەنم ژ جۆتكاران ب 185 لێرەیێن سووریێ دەستنیشانكریە، كو سالانە ب سەد هەزاران تەن گەنم ژ جۆتكارێن رۆژئاڤایێ كوردستانێ دكرە.

ل گۆری چاڤدێران، كێمبوونا نرخێ كرینا گەنم ژ ئالیێ پەیەدێ ڤە ب بەرامبەر نرخێ كو رێژیمێ دەستنیشانكریە، و رێپێدان ژبۆ جۆتكار ئازادبە گەنمێ خوە بفرۆشە ئالیێ كو ئەو دخوازە، نامەیەكە زەلال و ئەشكەرە ژ پەیەدێ بۆ جۆتكارانە: هەرن گەنمێ خوە بدن ریژیمێ یان ئەمێ ئیرزانتر ژ وە بكرن.

ل رۆژئاڤایێ كوردستانێ هن بهن وەرزێ بەرهەمئینانا بەرهەمێن چاندنیێ و بتایبەت گەنم نێزیك دبە، چۆتكار ژی ناڤبەرا نرخێ كێم یێ فرۆشتنا بەرهەمێن خوە كو ژ ئالیێ پەیەدێ ڤە هاتیە دەستنیشانكرن، و بوهابوونا تەكلیفەیێن بەرهەمئینانێ بیچارە مانە.

1039