گرۆپێن چەكدار ل عەفرینێ تاوانین مرۆڤی دەرهەقێ مللەتێ كورد دكن

ژ دەستپێكا دەرباسبوونا گرۆپێن چەكدار ژبۆ هەرێما عەفرینێ، هەمی رەنگێن بنپێكرنان دەرهەقێ مللەتێ كورد یێن رەسەن تێكرن، ژ سیاسەتێن برچیبوونێ ، كۆچبەركرنێ، گوهەرتنا دەمۆگرافی ، دزی ، تالانكرن ، دەستەسەركرنا مال ومولك ، زەڤیێن چاندنیێ ، سەپاندنا باج وئەتاواتان ورەڤاندنێ و ئەشكەنجەكرنێ و خوەستنا گوژمێن پەرەیان ل همبەر ئازادكرنا وان تێن خوەستن.

مجدی احمد عزو (21) سالی یە، ئەڤە زێدەتری سالەكێ وسێ مهانە گرتی یە د زندانا معصرە ل باژارێ ئعزازێ دە ، ژ ئالیێ گرۆپا ب ناڤێ ابو علی سجو ڤە و گرۆپین چەكدار یێن ل عەفرینێ ئەو رەڤاند بوو و هەتا نها چارەنڤیسا وی نەدیارە وداخوازا 4000 هەزار لێرەیی توركی ل همبەر ئازادكرنا وی.

هەروها وەلاتیێن ب ناڤێ عواد علی چقلی ، چ گوندێ قەرمیتلەقێ یە و نشتەجیێ باژارۆكێ جندێرسێ یە ، وكارێ ئاڤاكرنا ئاڤاهییان و بالەخانەیان دكە و ژ ئالیێ گرۆپا چەكدار یا ب ناڤێ احرار الشرقییە ڤە هاتییە رەڤاندن.

هەروها وەلاتیێ ب ناڤێ محمد ابراهیم ژ گوندێ خولالكا یێ سەر ب ناڤچەیا بلبلێ ڤە رۆژا (16.5.2019) ل خەستەخانەیەك باژارێ ئستەنبۆلێ ژیانا خوە ژ دەستدا ، ئەو ژی ژبەر كو گەلەك جاران هاتبوو گرتن و داوین جار راستی ئەشكەنجەیەك تووند ودژوار هاتبوو ، لەوما ژیانا خوە ژ دەستدا.
ل گۆر خەلكێ گوند ، داوین جار دەما كو محمد ابراهیم هاتبوو رەڤاندن، ئەو بەرڤە كارێ خوە دناڤا زەڤیێ خوە یێ دارێ مێوانە چووبوو وراستی ئەشكەنجەیەك تووند هات و د ئەنجام دە ل خەستەخانەیەك ئستەنبۆلی ژیانا خوە ژ دەستدا.

هەر د ڤێ دەربارێ دە، رۆژا (13.5.2019)، گرۆپەك چەكدار ل باژارێ ئعزازێ سێ وەلاتیێ كورد ، دەما كو بەری وان ل خەستەخانەیێ بوون ژبۆ چارەسەریێ ، ئەو رەڤاندن و نها ژی لهمبەر ئازادكرنا هەر یەك ژ وان (100) هەزار دولار تێ خوەستن.

د گرتە ڤیدیویەكێ بەلاڤ بوویە یەك ژ وان وەلاتیان ب ناڤێ شرف الدین سیدو ، كو خەلكێ باژارۆكێ جندێرسێ یە ، ب ئاوایەكی تووند هاتبوو ئەشكەنجە كرن و داخوازا (100) هەزار دولا ژ هەڤژینا وی كرنە، ل بەرامبەر ئازادكرنا وی.

هەروها رشید حمید خلیل یێ (40) سالی و كورێ وی (محمد خلیل ) یێ (9) سالی ، كو خەلكێ گوندێ بێلیێه یێ سەر ب ناڤچەیا بلبلێ نە و نشتەجیێ ناڤچەیا جندێرسێ نە بێ سەرۆشۆنن وچارەنڤیسا وان نەدیارە.

مالباتین كورد ل هەرێما عەفرینێ هەوار دكن كور ی ل پێشییا ڤان كریار و بنپێكرنان وەرن گرتن و خەلكێ ژ ڤێ ستەمكاریێ وزۆرداریێ رزگار بكن و گرۆپێن چەكدار ژ تەڤاهییا ناڤچەیێ كوردستانێ دەرخینن.

ر.ع

511