خوەنیشاندان لدژی پ ك ك و هسد ل دێرازۆرێ بەردەوامن
د رۆژا خوە یا چاران دە خوەنیشاندان و بانگا دەرخستنا چەكدارێن سووریایا دیموقراتیك كو چەكدارێن پەیەدێ بەشێ سەرەكەنە ژێ و لدژی پەكەكە، ل گوندەوارێ دێرازۆرێ بەردەوامن.
ئاژانسا سانا یا رێژیما ئەسەد بەلاڤكریە كو ل باژارۆك و گوندێن ئەلبوسەیرە و ماشخ و ئەلزەمان و ئەلنەملیە و تیب ئەلفال و ئەلتەیانە ل گوندەوارێ رۆژهلات و باشوورێ رۆژهلات یێ دێرازۆرێ ژ سەرێ سبەها ئیرۆ ڤە خوەنیشاندان تێنە لدارخستن و بانگا دەركەتنا چەكدارێن سووریایا دیموقراتیك دكن.
ل گۆری ژێدەرنە خوەجهی كو خوەنیشاندەران رێیێن سەرەكە گرتنە و رەوشەكە تەڤلیهەڤیێ دەركەتیە هۆلێ، و لگۆندێ ئەلتەیانە ژی چەكدارێن هەسەدە گولە بەردانە خوەنیشاندەران.
د هەردوو رۆژێن بۆری دە خوەنیشانداننە بەرفرەه ل باژارۆكێ ئەلبسێرە و گوند و ناڤچەیێن دەردۆرێ هاتنە ئەنجامدان، و د وان خوەنیشاندانان دە سلۆگان و گۆتن لدژی پەكەكە و پەیەدێ و یەپەگە و هەسەدە و سەرۆكێ پەكەكە عەبدولا ئۆجەلان هاتن بلندكرن، هەروەها رێیێن سەرەكە یێن ڤی باژارۆكی ژ ئالیێ خوەنیشاندەران ڤە هاتنە گرتن.
بەریا سێ رۆژان ل هەردوو باژارۆكێن ئەلكەسرە و محێمیدە و هەردوو گوندێن ئەلجنێنە و ئەلحیسان یێن گوندەوارێ دێرازۆرێ ژی خوەنیشاندان هاتن لدارخستن وەكە نەرازیبوون ژبەر خرابیا رەوشا ئەولەكاری و بلندبوونا نرخێ كەلوپەلان.
ل گۆری رەوانگەها سووری یا مافێ مرۆڤان بەلاڤكربوو كو چەكدارێن سووریایا دیموقراتیك ب گولەیان ئەو خوەنیشاندان بەربەلاڤ كرن، لێ خوەنیشاندەران چەكێن وان چەكداران ژ وان ستاندن و ئەو ژ گوندێن خوە دەركرن و رێبەند دانین.
ل ناڤچەنە دەرڤەیێ رۆژئاڤایێ كوردستانێ مینا رەقا و تەبقا و منبج و دێرازۆرێ پەیەدێ ب هەزاران جوانێن كورد تەڤلی شەرێن خوە ل وان ناڤچەیان كرنە و دانە شەهیدكرن، ل گۆری هن ئاماران كو دەردۆرا بیست هەزار جوانێن كورد ل وان ناڤچەیان هاتنە شەهیدكرن ، و نها ژی خەلكێن وان ناڤچەیان بانگا دەركەتنا چەكدارێن پەیەدێ و هەسەدەێ ژ وان ناڤچەیان دكن.
560
