نەرازیبوون و خوەنیشاندان ل ناڤچەیێن ژێر كۆنترۆلا هسد بەرفرەه دبن

نەرازیبوون و خوەنیشاندان ل ناڤچەیێن ژێر كۆنترۆلا چەكدارێن سووریایا دیموقراتیك كو چەكدارێن پەیەدێ بەشێ سەرەكەنە ژێ بەرفرەه دبن، ل هەردوو باژارۆكێن ئەلكەسرە و محێمیدە و هەردوو گوندێن ئەلجنێنە و ئەلحیسان یێن گوندەوارێ دێرازۆرێ خوەنیشاندان هاتن لدارخستن وەكە نەرازیبوون ژبەر خرابیا رەوشا ئەولەكاری و بلندبوونا نرخێ كەلوپەلان.

ل گۆری رەوانگەها سووری یا مافێ مرۆڤان كو چەكدارێن سووریایا دیموقراتیك ب گولەیان ئەو خوەنیشاندان بەربەلاڤ كرن، لێ خوەنیشاندەران چەكێن وان چەكداران ژ وان ستاندن و ئەو ژ گوندێن خوە دەركرن و رێبەند دانین.

ل گوندێ سوێدان ژی یێ گوندەوارێ دێرازۆرێ نەرازیبوونەكە مەزن پشتی كوشتنا زیندانكریەكی ب ئشكەنجەیێ دەركەت هۆلێ، هەروەها ل نێزیكی باژارۆكێ ئەلشحێل ژی تەرمەك سەرژێكری نەناس هات دیتن.

ل باژارێ رەقا و گوندەوارێن وێ ژی بەردەوام تەرۆركرن و خوەنیشاندان لدژی چەكدارێن سووریایا دیموقراتیك تێن ئەنجامدان، و گەلەك جاران هەسەدێ چوون و هاتن بشەڤ ل وان ناڤچەیان ژبەر رەوشا ئەولەكاریێ قەدەغەكریە.

ل ناڤچەنە دەرڤەیێ رۆژئاڤایێ كوردستانێ مینا رەقا و تەبقا و منبج و دێرازۆرێ پەیەدێ ب هەزاران جوانێن كورد تەڤلی شەرێن خوە ل وان ناڤچەیان كرنە و دانە شەهیدكرن، ل گۆری هن ئاماران كو دەردۆرا بیست هەزار جوانێن كورد ل وان ناڤچەیان هاتنە شەهیدكرن .

684