ئەنجوومانا ئیزیدیێن سووریێ بانگا خوە دگهینە جڤاكا ناڤدەولەتی

ئیرۆ(24.4.2019)، ئەنجوومانا ئیزیدێن سووریێ دەربارێ كریارێن حكوومەتا لبنانێ دەرهەقێ پەنابەرێن سووریێ دە بانگا خوە دگهینن جڤاكا ناڤدەولەتی.

د بانگا ئەنجوومانا ئیزدیێن سووریێ دە هاتیە، پەنابەرێن سووریێ ل لبنانێ، و تایبەتی ژی پێكهاتەیا ئیزیدی ، ترسا وان هەیە كو حكوومەتا لبنانێ وان بدارێ زرۆێ ونەچاری ڤەگەرینە سووریێ، بی چ گارەنتییەكە ناڤدەولەتی ونەتەوەی ژ سەلامەتییا وان رە هەبە وژ ئالیێن حكوومەتا سووریێ ڤە راستی ئاستەنگییان نەیێن یان هەر گرۆپەكی دن چەكدار ل سووریێ.

ئەنجوومان د بانگا خوە دە دبێژە، ئەم باش بارێ گران یێ كو حكوومەتا لبنانێ هلگرتی پشتی پێشوازیكرن ل هەزارێن پەنابەرێن سووریێ كو ژ بەر گرتن و ئەشكەنجەیێ وكوشتنێ رەڤینە، وئەو بەرپرسیاریتییا حكوومەتا لبنانێ جهێ سپاسیێە كو ل مللەتێ سووریێ ب خوەدی دەركەتییە.

ژ خوە پێكهاتەیا ئیزیدی ل سووریێ دە یا هەری زێدە راستی بنپێكرن و ئەشكەنجەیێ هاتییە چ ژ ئالیێ مرۆڤی ڤە بە و چ ژ ئالیێ ، رەوشەنبیری و ئۆلی ڤە بە ، تایبەتی ژی ل دەڤەرا عەفرینێ . مالێن كوردێن ئیزیدی ل عەفرینێ هاتنە دەستەسەركرن وحكوومەتا سووریێ ژی چ گوهدان نەدایە مافێن ئیزیدیان و ژ ئالیێ جڤاكی و ئۆلی ڤە هاتبوون بنپێكرن.

هەر دیسا ئەنجوومانا ئیزیدێن سووریێ د بانگا خوە دە دبێژە، بلا حكوومەتا لبنانێ دۆسەیا پەنابەرێن سووریێ ژ بازنەیێ هەڤكێشیێن سیاسی دە دەرخە و باڤێژە دناڤا دانووستاندنێن نەتەوەیێن یەكگرتی و دەولەتێن پشتەڤانێن رەوشا سووریێ و ب دارێ زۆرێ ونەچاری مللەتێ سووریێ ڤەنەگەرینە وهەروها ئەنجوومانێ داخوازا پاراستنا ئیزیدێن ل لبنانێ كر و هیڤی خوەست كو رەوشا وان ل بەرچاڤ وەرن گرتن.

ئەنجوومانا ئزیدیان داخواز ژ جڤاكا ناڤدەولەتی كر كو بەرێ خوە بدە بنپێكرنین كو دەرهەقێ مللەتێ عەفرینێ دە تێن كرن ، ژ دزی و تالانكرن ، رەڤاندن، كوشتن، و دەستەسەركرنا مالان وتەرۆركرنا هاولاتییان ونەچار كرنا كوردێن ئیزیدی داكو بدارێ زۆرێ ببن موسلمان.

ئەنجوومانێ دا زانین كو سیاسەتا دەستبەردانا ڤان گرۆپان ل عەفرینێ سیاسەتا گوەهەرتنا دەمۆگرافی یە دەرهەقێ مللەتێ عەفرینێ دە، وونداكرنا ناسنامەیا عەفرینێ یە ، وئەڤ بێ دەنگییا جڤاكا ناڤدەولەتی جهێ نەرەحەتییا مەیە.

د داویا بانگا خوە دە، ئەنجوومانا ئیزیدیێن سووریێ، داخواز ژ جڤاكا ناڤدەولەتی كر كو ل سەر بنپێكرنان راوەستن و بانگ ل حكوومەتا لبنانێ و دەولەتێن هەریمی كر كو كار ل سەر پاراستنا ئیزیدێن كو ل سەر خاكا خوە نە بكن و وان نەچار نەكن كو راستی بنپێكرن و مەترسێن وەرن.

856