36 رێخستنێن ياسايى داخوازا راوهستاندنا بنپێكرنان ل عهفرينێ دكن
هژمارهك رێخستنێن یاسایی ویێن جڤاكا سڤیلا سووریێ بانگ ل جڤاكا ناڤدهولهتى ورێخستنێن ناڤدهولهتى كر كو بنپێكرنێن نه مروڤی یێن كو گروپێن چهكدار ل عهفرینێ پێ رادبن راوهستینن .
36 رێخستنێن سڤیل ویاسایی د داخویانیهكێ ده راگهاند كو گروپێن چهكدار ل عهفرینێ بهردهوامن د بنپێكرنێن خوه دهرحهقێ سڤیلان ل باژارێ عهفرینێ وهكى دزیێ وبنچاڤكرنێ و ومال وێرانكرنا مال وملكێن خهلكێ ههروهها دهستهسهركرنا مال وملكێن خهلكێ ههتا گهشته ئاستهكی كو خهلك ژ مالێ وان دهركرن وهكو گاڤهكى ژ بو كوچباركرنا خهلكێن باژار یێن رهسهن یێن كو هین ل سهر مال وملكێن خوه نه .
داخویانیا ناڤبوری دیاركر كو د 30-3-2019 گروپێن چهكدار كهسایهتیا نشتمانى یێ بناڤێ علی ردا ئهندامێ ئهنجومهنا نشتمانى یا كورد ل سووریێ كو تهمهنێ وى 80 ساله ل سهر دهرگههێ باژارێ عهفرینێ گرتن و ئهو رادهستى ئهولهكاریا رێژیما سووریێ كرن .
داخویانیێ ههروهها ئهشكهره كر كو پشتره حسێن ئیبش ئهندامێ كومیتا ناڤهندى یا پارتیا دیموقراتا كوردستان سوریا وسهروكێ ئهنجومهنا خوجههی یا ئهنهكهسێ ل باژاروكێ شران گرتن كو تا نهها ژى گرتیه .
رێخستنێن ناڤبوری د داویا داخویانیا خوه ده تهكهز كرن كو ئهو ڤان كریار وگرتنان دهرحهقێ وهلاتیێن سڤیل ل عهفرینێ شهرمهزار دكن بتایبهت گرتنا كهسایهتێن نشتمان پهروهر وخودان دیروك د دیروكا كوردی ل دهڤهرێ وبانگا سهربهست بهردانا ههمى گرتیان كرن ههروهها داخواز ژ جڤاكا ناڤدهولهتى ورێخستنێن یاسایی كرن كو ڤان كریاران راوهستینن ودهرگهه وهرن ڤهكرن ژ بو ڤهگهرا خهلكێن دهڤهرێ وپهیداكرنا پاراستنهك ناڤدهولهتى ژ دهڤهرێ كوردى ل كوردستانا سووریێ بگشتى .
476
